मुख्यमन्त्री शाहले एमालेबाहेक सबै दलबाट विश्वासको मत पाउने

२१ फागुन, धनगढी । गठबन्धनभित्र बाटै लिखित सहमतिको सर्त राखेपछि धरमरमा परेको सुदूरपश्चिममका मुख्यमन्त्री कमलबहादुर शाहको मुख्यमन्त्री पद जोगिने भएको छ । उनले आज आइतबार विश्वासको मत लिने तयारी गरेका छन् । लिखित समहति विना विश्वासको मत दिन नसकिने अडानमा रहेको नेकपा माओवादी र नागरिक उन्मुक्ति पार्टीले पनि उनलाई विश्वासको मत दिने भएको छ । नेकपा एकीकृत समाजवादी पार्टीले यसअघि नै विश्वासको मत दिने जनाइसकेको छ ।

दिउँसो १ बजेका लागि प्रदेशसभा बैठक आह्वान गरिएको भएपनि गठबन्धनभित्रका दलहरुबीच मत दिने विषयमा अन्तिम समझदारी नभइसकेकाले शाह अलमलमा थिए । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले सुदूरपश्चिम सरकारका पक्षमा मतदान गर्न पार्टीका सांसदहरुलाई निर्देशन दिएपछि यो मााहोल बनेको हो । प्रचण्ड निकट स्रोतले दिएको जानकारीअनुसार सुदूरपश्चिम प्रदेशमा कांग्रेस नेतृत्वको सरकारलाई आज विश्वासको मत दिन सांसदहरुलाई निर्देशन दिइएको छ ।

संविधानको धारा १६८ (३) अनुसार प्रदेश सभामा सबैभन्दा ठूलो दल रहेको कांग्रेस संसदीय दलका नेता कमलबहादुर शाहको नेतृत्वमा सरकार गठन भएको छ । माघ २६ गते गठित सरकारले ३० दिनभित्र विश्वासको मत लिनुपर्ने संवैधानिक व्यवस्था छ । जसअनुसार उनले आज विश्वासको मत लिने तयारी गरेका थिए ।

माओवादी केन्द्र संसदीय दलका नेता खगराज भट्टले विश्वासको मत दिनुअघि शनिबार साँझ मुख्यमन्त्रीलाई भेटेर पावरसेयरिङको विषय उठाएपनि मत नदिँदा केन्द्रमा असरपर्ने भएपछि मत दिन माओवादी पनि तयार भएको बताइएको छ । नागरिक उन्मुक्तिले दुई मन्त्रालय, २ राज्यमन्त्री र दुई संसदीय समितिमा सभापति माग गरेको थियो । तर, यस विषयमा के सहमति भयो भन्ने बाहिर नआएपनि उसले पनि मत दिने भएको छ ।

नेकपा माओवादी सुदूरपश्चिम संसदीय दलका नेता खगराज भट्टले गठबन्धनबाहिर जाने कुरा नहुने बताएका छन् । उनका अनुसार केन्द्रको सकुर्लर पनि यस्तै छ । योसँगै मुख्यमन्त्री शाहले प्रदेशसभाबाट विश्वासको मत लिदा बहुमत प्राप्त गर्ने लगभग निश्चित भएको छ । ५३ प्रदेशसभा सदस्य रहेको सुदूरपश्चिम प्रदेशसभामा मुख्यमन्त्रीले विश्वासको मत जित्न २७ सांसदको समर्थन चाहिन्छ । प्रदेशसभामा नेपाली कांग्रेसका १९, माओवादी केन्द्रका ११, नागरिक उन्मुक्तिका ७, नेकपा एकीकृत समाजवादीका ४ र स्वतन्त्र एक सांसद छन् । यहाँ एमालेका १० सांसद छन् ।

नागरिक उन्मुक्ति संसदीय दलका नेता रामेश्वर चौधरीले मुख्यमन्त्री शाहलाई विश्वासको मत दिने बताए । उनले भने ‘हामी विश्वासको मत दिन्छौँ । हामी सबै धनगढीमै छौँ । काठमाडौंमा रहेको म पनि आइसकेँ ।’ यसअघि नाउपाकी अध्यक्ष रञ्जिता श्रेष्ठले लिखित सम्झौताबिना विश्वासको मत नदिने बताएकी थिइन् । तर मुख्यमन्त्री शाह र नाउपाबीच के सहमति भयो भन्ने चाहिँ खुलेको छैन । एकीकृत समाजवादीले यसअघि नै विश्वासको मत दिने बताइसकेकोले शाह सरकारले निरन्तरता पाउने निश्ति भएको छ ।