छुट्टाछुट्टै सवारी दुर्घटनामा बालिकासहित २ जनाकाे मृत्यु

२३ फागुन, लालबन्दी । मंगलबारकाे छुट्टाछुट्टै सवारी दुर्घटनामा परी २ जनाको मृत्यु भएको छ । प्रहरी अनुसार सर्लाहीको बलरा नगरपालिका-२ मा भारतीय नम्बर प्लेटको कारको ठक्करबाट एक बालिकाको मृत्यु भएको छ ।

मृत्यु हुनेमा स्थानीय हरेशन सहनीकी १८ महिने छोरी मायाकुमारी रहेकाे सर्लाही प्रहरीले जनाएको छ । कारले बाटोमा खेलिरहेकी बालिकालाई मंगलबार बिहान ठक्कर दिँदा गम्भीर घाइते भएकी बालिकाको उपचारको क्रममा प्रादेशिक अस्पताल मंलगवामा मृत्यु भएको हो । ठक्कर दिने कारसहित चालकलाई प्रहरी चौकी छन्किटोलाले नियन्त्रणमा लिएको छ ।

यस्तै, सुनसरीमा सिटी सपफारीकाे ठक्करबाट एक जनाकाे ज्यान गएकाे छ । सुनसरीकाे रामधुनी नगरपालिका-१ झुम्का बजारमा सिटी सफारीको ठक्करबाट सोमबार राति रामधुनी-५ का ५९ वर्षीय भक्तबहादुर कार्कीकाे मृत्यु भएकाे जिल्ला प्रहरी कार्यालय सुनसरीका प्रहरी नायब उपरीक्षक राजकुमार राईले जानकारी दिए ।

पूर्वबाट पश्चिमतर्फ जाँदै गरेको को २ ह ३८७७ नम्बरको सिटी सफारीले पैदलयात्री कार्कीलाई ठक्कर दिएको थियो । उपचारकाे क्रममा उनकाे मृत्यु भएकाे हाे । सफारी चालक टहरी_५ का ३५ वर्षीय सुरेश चौधरीलाई नियन्त्रणमा लिएको प्रहरीले जनाएको छ ।