राप्रपा र रास्वपाले राष्ट्रपतिमा कसलाई भाेट हाल्ने भन्नेबारे घाेषणा गर्न नपाउने

२३ फागुन, काठमाडौं । राप्रपा र रास्वपाले राष्ट्रपति निर्वाचनमा मतदानबारे निर्णय लिन नपाउने भएका छन् । राष्ट्रपति निर्वाचनसम्बन्धी आचारसंहिताअन्तर्गत  माैन अवधिकाे समय सोमबार राति १२ बजेदेखि लागू भएका कारण कुनैपनि राजनीतिक दलले उम्मेदवारबारे मत दिन औपाचारिक निर्णय गर्न नपाउने भएका हुन् ।

राप्रपाले आज पार्टीको कार्य सम्पादन समितिको बैठक राखेर निर्णय लिँदैछ भने रास्वपाले भोलि २४ गते गते बुधबार मात्र कसलाई मत दिने भन्नेबारे टुंगो लगाउने भएको छ ।

राष्ट्रपतिका उम्मेदवार नेपाली कांग्रेसबाट रामचन्द्र पौडेल र एमालेबाट सुवासचन्द्र नेम्वाङ प्रतिस्पर्धामा छन् । रास्वपा र राप्रपालगायत केही दल राष्ट्रपतिमा कसलाई मत दिने भन्ने विषयमा अनिर्णित छन् । राष्ट्रपतिमा कसलाई मत दिने भन्नेबारे औपचारिक रुपमा घोषणा गर्न नेमकिपा, हाम्रो नेपाली पार्टी र संघीय समाजवादी पार्टीको बाँकी नै छ । स्वतन्त्र सांसदहरुमध्ये केहीले मुख खोलिसकेका छैनन् ।

आचार संहिता लागू भइसकेको अवस्थामा कुनैपनि दलले राष्ट्रपति निर्वाचनमा कसलाई भोट हाल्ने भन्ने विषयमा औपचारिक छलफल गरेर निर्णय गर्न नमिल्ने प्रमुख निर्वाचन आयोगले जनाएको छ । अब कुनैपनि दलले निर्वाचनबारे पक्षधरता देखाउन नमिल्ने र देखाएर दलमाथि स्पष्टिकरण सोधेर जरिवानादेखि दल खारेजीसम्मको कारबाही हुनसक्ने व्यवस्था रहेको आयोगको भनाइ छ ।

आयोगका अनुसार अब कसैको पक्षमा लाग्ने भनेर निर्णय गर्ने र प्रचारप्रसार गर्न पाउँदैनन् । राष्ट्रपतिमा फालना उम्मेदवारलाई भोट दिन्छौं भनेर औपचारिकनिर्णयसहित सार्वजनिक रुपमा आएको खण्डमा त्यस्ता दललाई कानूनी दायरामाा ल्याउने आयोगले जनाएको छ ।

भावी राष्टपतिको लागि यही फागुन २५ गते बिहान १० बजेदेखि दिउँसो ३ बजेसम्म नयाँ बानेश्वरस्थित संसद भवन परिसरमा मतदान हुँदैछ । संघीय संसद प्रतिनिधिसभा र राष्ट्रियसभाका सदस्य तथा प्रदेशसभा सदस्य गरी मतदानका लागि ८८१ जना मतदाता रहेका छन् ।