सङ्क्रमणकालीन न्याय मेलमिलाप आयोगबाट टुङ्ग्याउने विषय हो : महासचिव गुरुङ

२३, फागुन, काठमाडौं । नेकपा (माओवादी केन्द्र)का महासचिव देवप्रसाद गुरुङले सङ्क्रमणकालीन न्यायलाई सत्य निरुपण तथा मेललिाप आयोगबाट टुंग्याउने विषय भएको स्पष्ट पारेका छन् । पार्टीका अध्यक्ष समेत रहेका प्रधानमन्त्री प्रचण्डविरुद्ध सर्वोच्चमा मुद्दा दर्ता भएकै दिन उनले यस्तो प्रतिक्रिया दिएका हुन् ।

आज बिहान बालुवाटारमा माओवादीका घटकहरुबीचको छलफलपछि संचारकर्मीहरुसँग कुराकानी गर्दै संक्रमणकालीन न्याय र मान्यताअनुरुपका मुद्दा मेलमिलाप आयोगमार्फत समाधान गर्ने विषय भएको बताए ।

“अहिले सङ्क्रमणकालीन न्याय सम्बन्धितको विषयमा जे जस्ता बहस उठिरहेका छन्, । यसको क्षेत्राधिकार भनेको सङ्क्रमणकालीन न्यायको मान्यता अनुसार सत्य निरुपण मेलमिलाप आयोगमार्फत नै समाधान गर्ने विषय हो । यो विषायन्तर हुने कुरा हाेइन” उनले भने ।

उनले माओवादी आन्दोलनसँग सम्बन्धित विषय दीर्घकालीन रुपमा कसरी जान सकिन्छ भन्ने विषय पनि छलफल भएको बताए । ‘अहिलेको प्रचलित कानुनले, राज्यको बृहत् शान्ति सम्झौता र प्रचलित कानुनले चाहिँ सत्य निरुपण मेलमिलाप आयोग अथवा सङ्क्रमणकालीन न्यायको सिद्धान्त र मान्यताअन्तर्गत केन्द्रित छ । यसकारण ती निकायमा छिटोभन्दा छिटो संयन्त्र परिपूर्ति गरेर त्यसमार्फत नै सबै समस्या सम्बन्धित प्रक्रियाका बाँकी समस्या छिटोभन्दा छिटो हल गरिनुपर्छ” उनले भने ।

तत्कालीन माओवादीले संचालन गरेको १० वर्षे जनयुद्धमा मारिएका करिब १७ मध्ये ५ हजारको जिम्मा आफूले लिन सक्ने भनेर २०७६ मा दिएको अभिव्यक्तिलाई लिएर प्रधानमन्त्री प्रचण्डलाई पक्राउ गरी अनुसन्धान गर्न माग गर्दै सर्वोच्च अदालतमा आजै मात्र मुद्दा दर्ता भएको छ । मुद्दामा आउने बिहीबार सुनुवाइ हुने भएको छ । यसपछि माओवादी केन्द्रभित्र मात्र नभई माओवादी घटक तथा राजनीतिक वृत्तमा तरंग गएको छ ।