हाइड्रोजन गाडी चढ्नेबारे छलफल भइरहेकाे छ : प्रधानमन्त्री

२३ फागुन, काठमाडौं । प्रधानमन्त्री पुष्पकमल दाहालले आफू हाइड्रोजन गाडी चढ्नेबारे कार्यालयमा छलफल गरेको बताएका छन् । मंगलबार सोलुखोला दूधकोशी जलविद्युत आयोजनाको काठमाडौंबाट उद्घाटन गर्दै प्रधानमन्त्री प्रचण्डले हाइड्रोजन गाडी चढ्ने विषयमा प्रधानमन्त्री तथा मन्त्रिपरिषद कार्यालयमा छलफल भइरहेको र छिटै चढ्ने तयारी भइरहेको बताए ।

आफू प्रधानमन्त्री हुँदै गर्दा विद्युत प्राधिकरणका कार्यकारी निर्देशक कुलमान घिसिङले डिजेल र पेट्रोल गाडी छाडेर हाइड्रोजन गाडी चढ्न सुझाव दिएको बताए ।

विश्व ग्रिन इनर्जीबाट ग्रिन हाइड्रोजनतर्फ गइरहेको बताउँदै प्रधानमन्त्री प्रचण्डले ग्रिन हाइड्रोजनतर्फ देशलाई लगेर हाइड्रोजनबाट तमाम उद्योग व्यवसाय चलाउनेतिर सरकारले सोचिराखेको बताए ।

उनले विकसित देशमा विस्तारै हाइड्रोजन ऊर्जाको मात्रा गुणात्मक रुपमा बढिरहेको र नेपालमा हाइड्रोजन ऊर्जाको प्रचुर सम्भावना रहेकाले ग्रिन इनर्जीलाई हाइड्रोजनमा पुर्याएर देशको समृद्धिलाई किन अगाडि बढाउन सकिने बताए ।