संघीय र प्रदेशका सांसदका मतदान केन्द्र फरक, क्रस भोटिङको सम्भावना न्यून

२४ फागुन, काठमाडौं । निर्वाचन आयोगले बिहीबार हुँने राष्ट्रपति निर्वाचनको तयारी पुरा भएको जनाएको छ । नयाँ राष्ट्रपति चयनका लागि बिहीबार (भोलि) मतदान हुँदैछ । आयोगकाअनुसार संघीय सांसद र प्रदेश सांसदका लागि अलग अलग मतदान केन्द्र बनाइएको छ । मतदान विहान १० बजेदेखि दिउँसो ३ बजेस्म्म हुनेछ ।

काठमाडौंको नयाँवानेश्वरस्थित संसद् भवनको ल्होत्सेहल परिसरमा मतदान हुनेछ । मतदानका लागि दुईवटा केन्द्र तोकिएको र संघ र प्रदेशका सांसदले तोकिएको केन्द्रमा मतदान गर्नुपर्ने छ । मतदानका लागि आवश्यक परिचय पत्रबारे यसअघिनै निर्वाचन आयोगले जानकारी गराइसको छ । एउटा मतदान केन्द्रमा संघीय सांसद र अर्कोमा प्रदेश सांसदले मत खसाल्ने छन् । राष्ट्रपति निर्वाचनमा प्रदेशका ५५० र संघीय संसद्का ३३२ गरी कुल ८८२ जना मतदाता रहेका छन् ।

मतदाताको अन्तिम नामावलीमा नाम रहेको जनता समाजवादी पार्टीकी सांसद सहनाज रहमानको हृदयघातका कारण मृत्यु भएको छ भने नेपाली कांग्रेसका चन्द्र भण्डारी भारतमा उपचार गराइरहेका छन् । राष्ट्रपति निर्वाचनमा प्रदेश सांसदको ४८ र संघीय सांसदको ७९ मतभार गणना हुन्छ । बिहीबर बेलुका सात बजेसम्म निर्वाचनको नतिजा सार्वजनिक गर्ने तयारी रहेको निर्वाचन आयोगले जानकारी दिएको छ । मतदान सकिएलगत्तै सर्वपक्षीय बैठक बसेर मतगणना सुरु गर्ने बताइएको छ ।

राष्ट्रपति निर्वाचनमा दुई उमेदवारबीच प्रतिस्पर्धा हुँदैछ । आठदलीय गठबन्धनको तर्फबाट नेपाली कांग्रेसका नेता रामचन्द्र पौडेल र नेकपा एमालेकातर्फबाट उपाध्यक्ष सुवास नेम्वाङ उमेदवार रहेका छन् । आयोगले प्रदेश सांसद र संघीय सांसदका लागि छुट्टा छुट्टै मतपत्रको व्यवस्था गरेको छ । मतपत्रमा उमेदवारको नाम र फोटो राखिने भएको छ ।

कांग्रेसबाट प्रतिनिधि र राष्ट्रियसभा गरेर ९७ मत खस्ने भएका छन् । कांग्रेसले प्रतिनिधिसभामा प्रत्यक्ष र समानुपातिक गरेर ८९ सिट जितेको छ । तर, सांसद टेकबहादुर गुरुङ पनि मतदान प्रकृयामा भाग लिन पाउने छैनन् । विशेष अदालतमा भ्रष्टचार मुद्दा चलिरहेका कारण उनी सांसदको हैसियतमा भूमिका निर्वाह गर्न पाएका छैनन् । चन्द्र भण्डारीमा पनि उपस्थित हुन नसक्दा कांग्रेसका ८७ जना प्रतिनिधिसभा सदस्यले मात्र मतदान प्रक्रियामा भाग लिने भएका छन् ।

कांग्रेसको प्रदेशतर्फ १७५ सांसद छन् । यस्तै, जनता समाजवादी पार्टीबाट पनि एक मत कम खस्ने भएको छ । पार्टीबाट समानुपातिक सांसद बनेकी सहनाज रहमानको निधन भएपछि उनी स्थान रिक्त रहेको हो । उनको स्थानमा पार्टीले अर्को सांसद पठाएको छैन । उनीबाहेक जसपासँग १४ जना संघीय सांसद छन् । जसमध्ये ११ जना प्रतिनिधिसभा र ३ जना राष्ट्रियसभा सदस्य छन् । उनीहरुलाई पार्टीले मतदानका लागि निर्देशन दिइसकेको छ ।

यसैविच जनजातीको भोट पार्टी निर्देशनभन्दा बाहिर जाने आशंका गरिएको छ । तर, नेताहरुले केहि भोट पार्टीको निर्देशनभन्दा बाहिर गएपनि खास फरक नपर्ने बताएका छन् । पौडेलका पक्षमा नौ दलीय गठबन्धन छ । यसबाट केहि जनजातीका भोट एमाले उम्मेदवार सुवास नेम्वाङलाई जानसक्ने आशंका गरिएको हो । राष्ट्रपति निर्वाचनमा राष्ट्रिय प्रजातन्त्रपार्टी र राष्ट्रिय स्वतन्त्र पार्टी खुलेका छैनन् ।

राप्रपाले मतदान गर्ने निर्णय गरेपनि उसको भोट एमालेमा जाने निश्चित छ । रास्वपाले भने सांसदहरुलाई सवतन्त्र अधिकार दिने सम्भावना देखिएको छ । यति हुँदा पनि गठबन्धनका उम्मेदवाार पौडेल भारी मतले अगाडी देखिएका छन् ।