साढे २ किलो चरेससहित लालसरा भैरहवाबाट पक्राउ

२६ फागुन, काठमाडौं । रुपन्देही प्रहरीले भैरहवास्थित बेलहिया बसपार्कबाट साढे २ केजी चरेससहित एक महिलालाई पक्राउ गरेको छ ।

सुनौलीतर्फ जाँदै गरेकी बाग्लुङको निसिखोला गाउँपालिका–६ बस्ने ३६ वर्षीया लालसरा घर्तीलाई शंका लागी चेकजाँचका क्रममा प्रतिबन्धित लागूऔषध चरेसको उक्त परिमाणसहित धुबार साँझ पक्राउ परेको जिल्ला प्रहरी कार्यालय रूपन्देहीका प्रवक्ता प्रहरी नायव उपरीक्षक श्यामु अर्यालले बताए ।

शंकास्पद रूपमा हिँडिरहेकी घर्तीलाई रोकी सोधपुछ गर्दा उनको साथबाट साढे दुई किलो चरेस बरामद गरिएको प्रहरीले जनाएको छ । घर्तीलाई प्रहरीले बिहीबार नै सार्वजनिक गरेको थियो । चरेस कहाँबाट कहाँ पुर्याउन खोजिएको हो भन्नेबारे अनुसन्धान भइरहेको जनाइएको छ ।