एआईजी बढुवा गर्न निर्वाचन आयोगको सहमति

२६ फागुन, काठमाडौं । नेपाल प्रहरीमा अतिरिक्त महानिरीक्षक (एआईजी) पदमा बढुवा गर्न निर्वाचन आयोगले अनुमति दिएको छ । राष्ट्रपति र उपराष्ट्रपतिको निर्वाचन आचारसंहिता लागू रहेको अवस्थाका कारण गृह मन्त्रालयले आयोगसँग अनुमतिका लागि पत्राचार गरेको थियो । सो अनुसार बिहीबार मात्र आयोगबाट बढुवा सिफारिस गर्न अनुमति प्राप्त भएको गृह मन्त्रालय स्रोतले जनायो ।

प्रहरीमा ५ वटा प्रहरी अतिरिक्त महानिरीक्षक (एआईजी) पद रिक्त छ । बढुवाको काम रोकिँदा डीआईजीबाट सिधै आईजीमा बढुवा गर्नुपर्ने अवस्था उत्पन्न हुने संभावना बढेको थियो । तर सहमतिपछि यो संभावना हटेको छ ।

उमेर हदका कारण आईजी धीरजप्रताव सिंह आउँदो चैत ११ मा नियमित अवकाशमा जाँदैछन् । उनले संभावित परिस्थितिलाई ध्यान दिँदै अवकाशको अवधि बढाउन चलखेल जारी राखेका छन् । आईजी सिंहसँगै उनका ब्याचमेटहरु २०७९ चैत ११ मा अवकाशमा जाँदैछन् ।

आयोगको सहमतिसँगै गृह मन्त्रालयले रिक्त पदमा बढुवाको तयारी थालेको स्रोतले बतायो । एआईजी बढुवा लाइनमा डीआईजीहरु बसन्त बहादुर कुँवर, टेकप्रसाद राई, दीपक थापा, श्यामलाल ज्ञवाली र किरण बज्राचार्य बढुवा प्रतिस्पर्धामा अगाडि छन् ।

 डीआईजीको मेरिट लिस्टमा बसन्तबहादुर कुँवर एक नम्बरमा छन् । दुई नम्बरमा टेकप्रसाद राई, तेस्रो नम्बरमा दीपक थापा छन् । यसअघि मेरिट लिस्टको तेस्रो नम्बरका डीआईजी अशोक सिंहले जन्ममिति विवादका कारण राजीनामा दिइसकेका छन् ।