आधिकारिक निर्णय नहुँदा उपराष्ट्रपतिको विषयले गठबन्धनमा तनाव

२६ फागुन, काठमाडौं । राष्ट्रपतिको उम्मेदवार बारे आठ दलीय गठबन्धनमा पहिले नै सहमति भएकाले कसैको दावी विरोध नरहेपनि उपराष्ट्रपतिको विषयले भने गठबन्धनमा तनाव उत्पन्न गराएको छ । सुरुमा आठ दलबीच सहमति भएपनि निर्वाचनको समयमा १० दलले राष्ट्रपतिका उम्मेदवार रामचन्द्र पौडेललाई मतदान गरेका थिए । यही मतदानको अवस्थालाई आधार मानेर हेर्ने हो भने यतिबेला सत्ता पक्षमा पहिलेका आठसहित डा. बाबुराम भट्टराईको नेपाल समाजवादी र राष्ट्रिय स्वतन्त्र पार्टी (रास्वपा) पनि मिसिएको छ ।

आठ दलीय गठबन्धनमा उपराष्ट्रपति उपेन्द्र यादव नेतृत्वको जनता समाजवादीलाई दिने मौखिक सहमति भएको पनि यसमा आधिकारिक सहमति भएको छैन् । जसपाबाट उपराष्ट्रपति आउँदा नेकपा एमालेले पनि उम्मेदवारी नदिने बताइरहेको थियो । तर, शुक्रबार आठ दलीय गठबन्धनमा रहेको नागरिक उन्मुक्ति पार्टीले अध्यक्ष रञ्जिता श्रेष्ठ चौधरीलाई उपराष्ट्रपतिको उम्मेदवार बनाउन निर्णय गरेपछि उपराष्ट्रपति पदको उम्मेदवारका विषयमा गठबन्धनभित्र तनाव देखिएको हो । पूर्व सहमति अनुसार गठबन्धनबाट जो बनेपनि एकजना मात्र उपराष्ट्रपतिको सााझा उम्मेदवार बन्न सक्छ ।

जसपाले उपराष्ट्रपतिमा उम्मेदवार उठाउने निर्णय गरेपछि आज मात्रै नागरिक उन्मुक्ति पार्टीले अध्यक्ष रन्जिता श्रेष्ठलाई उपराष्ट्रपतिको उमेदवार बनाउने निर्णय गरेको छ । आज बसेको संसदीय दलको बैठकले श्रेष्ठलाई उमेदवार बनाउने निर्णय गरेको प्रमुख सचेतक गंगाराम चौधरीले जानकारी दिए । आठ दलीय गठबन्धनले उपराष्ट्रपति जनता समाजवादी पार्टी (जसपा) लाई दिने निर्णय गरेको थियो । आठ दलमा नागरिक उन्मुक्ति पार्टी पनि छ । उक्त निर्णयका बाबजुद नाउपाले यस्तो निर्णय गरेको हो । उमेदवारीबारे गठबन्धनमा छलफल बाँकी रहेको कांग्रेस नेताहरुको भनाइ छ ।

जसपाले रामसहायप्रसाद यादवलाई उपराष्ट्रपतिको उम्मेदवार बनाउने निर्णय गरिसकेको छ । जसपाले यादवलाई उपराष्ट्रपतिको उम्मेदवार बनाउने निर्णय बिहीबार नै गरेको छ । जसपाको कार्यकारिणी समितिको बिहीबारको बैठकले यादवलाई उपराष्ट्रपति उम्मेदवार उठाउने निर्णय भएको हो । पूर्वमन्त्री यादव प्रतिनिधिसभामा जसपाको संसदीय दलको नेता हुन् । उनी बारा–२ बाट प्रतिनिधिसभा सदस्यमा निर्वाचित भएका थिए । गठबन्धनको तर्फबाट राष्ट्रपतिमा कांग्रेसका वरिष्ठ नेता रामचन्द्र पौडेल निर्वाचित भएका छन् । उपराष्ट्रपतिको निर्वाचन चैत ३ गते हुँदैछ ।

यसैबीच नेपाली कांग्रेसका उपसभापति पूर्णबहादुर खड्काले उपराष्ट्रपति निर्वाचनबारे केही समझदारी र सहमति भएपनि गठबन्धनबीच यसबारे औपचारिक निर्णय नभएको बताएका छन् । उनले अब छिटै नै गठबन्धनकाे बैठक बसेर औपचारिक निर्णय गर्ने बताए । उनले दलहरुको बीचमा सहमति गरेर उपराष्ट्रपतिको निर्वाचनमा पनि सकारात्मक परिणाम ल्याउने दावी गरेका छन् । उनले उपराष्ट्रपति निर्वाचनको बारेमा केही समझदारी, सहमति भएको स्वीकार गर्दै प्रधानमन्त्रीजीले त्यसको संयोजन गरेकाले आज नै गठबन्धनको बैठक बस्न सक्ने बताए ।

यता, निर्वाचन आयोगले उपराष्ट्रपति निर्वाचनको कार्यतालिका सार्वजनिक गरेको छ । आयोगले कार्यतालिका सार्वजनिक गर्दै चैत ३ गते हुने उपराष्ट्रपति निर्वाचनको मनोनयन दर्ता गर्ने समय शनिबारका लागि तोकेको छ । सोही दिन मनोनयनपत्र दर्ता भएको उम्मेदवारको सूची प्रकाशन गर्ने र उम्मेदवारको विरोधमा उजुरी दिन मिल्ने कार्यतालिकामा उल्लेख छ । २८ गते मनोनयनपत्र र उजुरी उपर जाँचबुझ गरी निर्णय गर्ने, उम्मेदवारको अन्तिम नामावली प्रकाशन गर्ने कार्यतालिका रहेको छ भने चैत ३ गते मतदान गर्ने कार्यक्रम रहेको उल्लेख गरिएको छ ।