प्रधानमन्त्री प्रचण्डविरुद्ध मुद्दामा सुनुवाइ सकियो

२६ फागुन, काठमाडौं । नेकपा (माओवादी केन्द्र)का अध्यक्ष एवं प्रधानमन्त्री पुष्पकमल दाहाल ‘प्रचण्ड’विरुद्ध सर्वोच्च अदालतमा दर्ता मुद्दाको सुनुवाइ सकिएको छ ।

प्रचण्डविरुद्ध दायर रिट निवेदनको आज न्यायाधीश ईश्वरप्रसाद खतिवडाको एकल इजलासमा सुनुवाइ भएको हो । निवेदक ज्ञानेन्द्रराज आरण र चिरञ्जीविवास गिरिले द्वन्द्वकालीन घटनामा भएका ज्यान मुद्दामा पक्राउ गरी अनुसन्धान गर्न अन्तरिम आदेश मागसहित यही मंगलबार रिट दायर गराएका थिए ।

रिट निवेदकका तर्फबाट वरिष्ठ अधिवक्ता सुरेन्द्र भण्डारी, बालकृष्ण न्यौपानेलगायत कानुन व्यवसायीले बहस गरेका थिए । आदेश आजै आउने सर्वोच्च प्रशासन स्रोतले जनायो ।

सर्वोच्च प्रशासनले दरपीठ गरेको उक्त रिट दर्ता गर्न पनि न्यायाधीश खतिवडालगायतकै संयुक्त इजलासले आदेश दिएको थियो । आज सुनुवाइ उनै खतिवडाको इजलासमा भएको हो ।

प्रधानमन्त्री प्रचण्डले २०७६ माघ १ गते सशस्त्र द्वन्द्वमा मारिएका १७ हजार जनामध्ये ५ हजारको जिम्मा आफूले लिने भनी दिएको अभिव्यक्तिलाई आधार बनाएर रिट दायर गरिएको हो ।