गठबन्धनबाटै उपराष्ट्रपतिमा तीन जनाको उम्मेदवारी, भोलीसम्ममा सहमति जुटाइने

२७ फागुन, काठमाडौं । राष्ट्रपतिमा मतदान गरेका १० राजनीतिक दलबीच सहमति जुट्न नसक्दा उपराष्ट्रपति पदमा गठबन्धनकै तीन जनाको उम्मेदवारी परेको छ । शनिवार विहान बसेको गठबन्धनको बैठकमा निर्वाचन आयोगले उपराष्ट्रपतिको उम्मेदवार बन्न विवादास्पद भनाइ राखेपछि पुरुष वा महिला भन्नेमा नै दलहरु अलमलमा परेको थिए । संविधानमा राष्ट्रपतिभन्दा फरक लिङ्ग वा समूहको हुनुपर्ने भनेपनि निर्वाचन आयोगले महिलालाई नै उपराष्ट्रपतिको उम्मेदवार बनाउनुपर्ने अडान राखेको छ ।

शनिवारको बैठकमा सहमति नभएपछि थप छलफल गरेर सहमति गर्ने भन्दै जनमत पार्टीबाट एक जना र जसपाबाट महिला र पुरुष दुबले उम्मेदवारी दिने भन्दै बैठक सकिएको थियो । बैठकपछि निर्वाचन आयोगले सार्वजनिक गरेको कार्यतालिकाअनुसार गठबन्धनबाट उपराष्ट्रपतिमा तीन जनाले उम्मेदवारी दिएका छन् । गठबन्धनबाट जनता समाजवादी पार्टी, नेपालबाट २ जना र जनमत पार्टीबाट १ गरी तीन जनाको उम्मेदवारी परेको हो । जसपाबाट जसपा संसदीय दलका नेता रामसहायप्रसाद यादव र प्रमिलाकुमारी यादवको उम्मेदवारी दर्ता भएको छ ।

प्रमिलाकुमारी यादवको प्रस्तावकमा रञ्जु झा, मृगेन्द्रकुमार सिंह यादव, नवलकिशोर शाह, दीपक कार्की, राजकिशोर यादव रहेका छन भने समर्थकमा अनिता देवकोटा, विमला सुवेदी, सीता गुरूङ, जयन्ती राई, मनिष सुमन रहेका छन् । त्यस्तै रामसहायप्रसाद यादवको प्रस्तावकमा जसपा नेता अशोककुमार राई, प्रदीप यादव, किशान श्रेष्ठ, शक्ति बस्नेत, रमेशजंग रायमाझी रहेका छन् । उनको समर्थकमा रेखा यादव, अम्बिका काफ्ले, प्रकाश ज्वाला, खिमलाल देवकोटा, भानुभक्त जोशी रहेका छन् ।

यस्तै गठबन्धनबाट नै जनमत पार्टीकी नेता ममता झाले पनि उपराष्ट्रपति पदका लागि उम्मेदवारी दर्ता गराएकी छिन् । गठबन्धनबाट उनले पनि उपराष्ट्रपति पदमा उम्मेदवारी दिएकी हुन् । उनको प्रस्तावकमा अब्दुल खान, अनिता देवी, गंगाराम चौधरी, अविराम शर्मा, रुपाकुमारी यादव रहेकी छिन् भने समर्थकमा गोमालाम सापकोटा, विनिताकुमारी सिंह, वसन्तकुमार कुशवाह, रामप्रकाश चौधरी, रानीकुमारी तिवारी रहेका छन् ।
नेकपा एमालेबाट भने उपाध्यक्ष अष्टलक्ष्मी शाक्यले उम्मेदवारी दर्ता गराएकी छिन् । उनको प्रस्तावकमा अध्यक्ष केपी शर्मा ओली, उपाध्यक्ष सुवासचन्द्र नेम्वाङ, छविलाल विश्वकर्मा, गोकर्ण बिष्ट, रघुवीर महासेठ छन् भने समर्थकमा कृष्णगोपाल श्रेष्ठ, महेश बर्तौला, तुलसा दाहाल, भगवती न्यौपाने, यशोदा रिजाल रहेका छन् । निर्वाचन आयोगले शनिबारका लागि उपराष्ट्रपतिको मनोनयन पत्र दर्ता गर्ने समय तोकेको छ । शनिबार बिहान ९ बजेदेखि २ बजेसम्मलाई मनोनयन दर्ताको समय तोकिएको छ । आइतबार उम्मेदवारको नाम फिर्ता लिने र अन्तिम नामावली प्रकाशन गर्ने कार्यतालिका रहेको छ ।

गठबन्धनकातर्फबाट तीन जनाको उम्मेदवारी परेपनि यसमा सहमति गरेर आइतबारसम्ममा एक नाम छनोट गर्ने बताइएको छ । विहानको बैठकमा सझा उम्मेदवारमा सहमति नभएपछि जनमत पार्टीले पनि उपराष्ट्रपतिमा उम्मेदवारी दिएको छ । जनमत र जसपाबीच सहमति गराउन गठबन्धनका शीर्ष नेताहरुले प्रयास गर्ने भएका छन् । शीर्ष तहमा पनि सहमति नभए जसपासँग मित्रवत प्रतिस्पर्धा गर्ने जनमत पार्टीले जनाएको छ । जसपाको कार्यकारिणी बैठकले महिला वा पुरुष उम्मेदवारबारे पनि अन्तिम निर्णय लिन बाँकी रहेको छ ।

यता, उम्मेदवारी र्दापछि जनमत पार्टीका अध्यक्ष सीके राउतले उपराष्ट्रपति पदमा पार्टीको उम्मेदवारी फिर्ता नहुने बताएका छन् । उनले सत्ता गठबन्धनमा आफूहरूले उपराष्ट्रपति पदमा दाबी गरेको, र जनमत पार्टीको उम्मेदवार नै गठबन्धनको आधिकारिक उम्मेदवार हुने गरी छलफल अगाडी बढ्ने बताएका छन् । उनले अझै पनि गठबन्धनबाट जनमत पार्टीकै उम्मेदवारलाई आधिकारिक बनाउन प्रयास गर्ने बताए । जनमत पार्टीबाट ममता झाले उपराष्ट्रपतिमा उम्मेदवारी दर्ता गराएकी छिन् ।