अष्टलक्ष्मी र ममताको उजुरीविरुद्ध रामसहाय यादवकाे लिखित प्रतिवाद

२८ फागुन, काठमाडाैं । उपराष्ट्रपतिका उम्मेदवार रामसहायप्रसाद यादवले आफूविरुद्ध उपराष्ट्रपति निर्वाचन अधिकृतको कार्यालयमा परेको उजुरीको जवाफ पेस गरेका छन् ।

उपराष्ट्रपतिका लागि उनले दिएको उम्मेदवारीविरुद्ध जनमत पार्टी र एमालेले उजुरी दिएपछि उनले त्यसको भोलीपल्ट नयाँबानेश्वरस्थित कार्यालयमा आज पुगेर लिखित जवाफ पेस गरेका हु्न् । उनले ३ पुष्ठ लामो लिखित जवाफ पेस गरेका छन् । उनीविरुद्ध एमालेकी उम्मेदवार अष्टलक्ष्मी शाक्य र जनमतकी उम्मेदवार ममता झाले शनिबार नै उजुरी दिएकी थिइन् ।

उनीहरुले राष्ट्रपतिमा पुरुष उम्मेदवार निर्वाचित भइसकेको अवस्थामा उपराष्ट्रपतिमा महिला उम्मेदवार हुनुपर्ने भन्दै यादवको उम्मेदवारी खारेजी रहेको जिकिर गरेका छन् । यादवले आफ्नो जवाफलाई लिखित प्रतिवादको रुपमा पेस गरेका हुन् ।

उनले संविधानले समावेशी, समानुपातिक सिद्धान्तको आधारमा राज्यका हरेक निकायमा मधेशी समूदायमा सहभागिताको हक हुने भनी किटानी व्यवस्था स्वीकार गरेको भन्दै उपराष्ट्रपतिमा महिला मात्र उम्मेदवार हुने कुरा संवैधानिक वा कानूनी व्यवस्थामा बाध्यकारी नरहेको जिकिर गरेका छन् ।

निर्वाचन अधिकृतको कार्यालयले उजुरीमाथि जाँचबुझ गरी आज मध्याह्न १२ बजेभित्र निर्णय गरिसक्ने र ५ बजेभित्र उम्मेदवारको अन्तिम नामावली प्रकाशन गर्ने कार्यतालिका छ ।

आगामी चैत ३ मा हुन गइरहेको उपराष्ट्रपति चुनावका लागि शनिबार एमालेबाट शाक्य, जनमतबाट झा, र जसपाबाट यादव र प्रमिलाकुमारी यादवले उम्मेदवारी दर्ता गरेका थिए । राष्ट्रपतिमा भने खसआर्य समुदायका रामचन्द्र पौडेल निर्वाचित भइसकेका छन् । उनले सोमबार कार्यभार सम्हाल्दैछन् । संविधानमा भने राष्ट्रपति र उपराष्ट्रपति फरक लिंग र समुदायका हुनुपर्ने व्यवस्था छ ।