उपराष्ट्रपतिको आधिकारिक उम्मेदवार टुंगो लगाउन सिंहदरबारमा गठबन्धनको बैठक

२८ फागुन, काठमाडौं । उपराष्ट्रपति पदको आधिकारिक उम्मेदवार टुंगो लगाउन सत्ता गठबन्धनको बैठक सिंहदरबारमा बसिरहेको छ ।

सत्ता गठबन्धनबाट जसपाका रामसहाय प्रसाद यादवको उम्मेदवारी निर्वाचन अधिकृतको कार्यालयले कायमै रहने निर्णय गरेलगत्तै बैठक बसेको हो । जसपाबाटै उपराष्ट्रपतिमा उम्मेदवारी दिएकी प्रमिलाकुमारी यादव र जनमत पार्टीबाट उम्मेदवारी दिएकी ममता झाको उम्मेदवारी फिर्ता गराउनेबारे छलफल भइरहेको एक नेताले बताए ।

रामसहायको उम्मेदवारी कायमै रहने निर्णय आयोगले गरेसँगै प्रमिलाकुमारीको उम्मेदवारी गठबन्धनको बैठकमा छलफल गरेर फिर्ता लिने जसपाका नेता प्रदीप यादवले बताइसकेका छन् ।

निर्वाचन अधिकृतको कार्यालयले आज दिउँसो ४ बजेभित्र उम्मेदवारी फिर्ताको समय तोकेको छ । त्यसपछि आजै ५ बजे अन्तिम नामावली प्रकाशन गर्ने कार्यालयले जनाएको छ । भावी उपराष्ट्रपति चयनका लागि आउँदो चैत ३ गते मतदान हुनेछ ।

उपराष्ट्रपतिमा नेकपा (एमाले)ले अष्टलक्ष्मी शाक्य उम्मेदवार बनाएको छ । शाक्य र रामसहायप्रसादबीच प्रतिस्पर्धा हुने संभावना बढेको छ ।