पपुवा न्यूगिगीविरूद्धको खेलमा नेपालले लियो छैटौं विकेट

२९ फागुन, काठमाडौं । घरेलु मैदान कीर्तिपुरमा जारी आईसीसी विश्वकप लिग(२ अन्तर्गतको अन्तिम त्रिकोणात्मक सिरिजमा आफ्नो तेस्रो खेलमा नेपालले आज पपुवा न्युगिनी (पीएनजी)को ६ विकेट लिएको छ । साेमबार टस जितेर ब्याटिङ रोजेको नेपालले सुरुवाती चरणलाई सशक्त रुपमा प्रस्तुत गरेको छ ।

नेपालका लागि सन्दीप लामिछानेले छैठौं सफलता दिलाएका छन् । व्यक्तिगत तेस्रो विकेट लिने क्रममा उनले १६ रन बनाएर खेलिरहेका पिएनजीका चार्ल्स अमिनीलाई आउट गरे ।

त्यसअघि ललितनारायण राजबंशीले पाँचौ सफलता दिलाएका हुन् । व्यक्तिगत दोस्रो विकेट लिने क्रममा उनले २३ औं ओभरको पाँचौ बलमा राइली हिकुरे ४ रन जोडेरआउट भए । उसका लागि कप्तान असाद भालाले सर्वाधिक २० रन बनाए ।

यस्तै सेसे बाउले १८ रन बनाए । लामिछानेकै बलमा बोल्ड हुनुअघि उनले २८ बल खेलेर ३ चौका प्रहार गरेका थिए । सोमपाल कामीले ओपनर हिरी हिरीलाई १४ रनमा आउट गराउँदा ललित राजवंशीले अर्का ओपनर किपेलिन डोरिगालाई २ रनमा बोल्ड गरे । पीएनजी ८२ रनसहित खेलिरहेकाे छ ।

आजको खेलमा नेपाली टिममा गुल्सन झाको स्थानमा करण केसीलाई टिममा समावेश गरिएको छ । नेपालले याेसहित ३ खेल खेल्नेछ ।