फरार सूचीमा रहेका नेहा चौधरीकी ससुरा रामप्रवेश पक्राउ

२९ फागुन, काठमाडौं । छोराको बिहेमा दाइजो लिएको कसुरमा महाेत्तरी औरहीकी नेहा चौधरीकी ससुरा पक्राउ परेका छन् । चौधरीकी ससुरा महोत्तरीको रामगोपालपुर नगरपालिका–५ का ६० वर्षीय रामप्रवेश चौधरीलाई खोजीका क्रममा आइतबार प्रहरीको फन्दामा परेका हुन् ।

लामो समयदेखि फरार रहेका श्रीमान पंकजका बुवालाई लुकिछिपी बसिरहेको अवस्थामा मनरासिस्वा नगरपालिका–२ कट्टी गाउँस्थित दशगजा क्षेत्रबाट पक्राउ गरिएको जिल्ला प्रहरी कार्यालय महोत्तरीले जनाएको छ । तीन वर्षको प्रेमसम्बन्धपछि २५ फागुन २०७८ मा नेहा र पंकजबीच सामाजिक परम्परा अनुसार जनकपुरधाममा विवाह भएको थियो ।

विवाहको ४ महिनादेखि नै पंकल र सुसुरासहित परिवारले नेहामाथि दुरव्यवहार र ज्यादति दिन सुरु गरेका थिए । पंकजले नेहासँग दाइजोको रुपमा काठमाडौंमा घर नकिनिदिएको भन्दै बारम्बार यातना दिन थालेपछि घटना बाहिर आएको थियो ।

ससुराले पनि दाइजो ल्यउन भन्दै निरन्तर घरेलु हिंसा र दुरव्यवहार गर्न थालेपछि न्यायका लागि पंकज र ससुराविरुद्ध प्रहरीमा किटानी दिएकी थिइन् । त्योबेला देखि नै ससुरा फरार थिए ।

नेहाले श्रीमान पंकज र परिवारका सदस्यविरूद्ध बकसपत्र बदर, जालसाजी, घरेलु हिंसा, दाइजो, मानाचामल र अंश मुद्दा दायर गरेकी छन् । पंकजले सम्बन्ध विच्छेदको मुद्दा दायर गरेको अवस्था छ । पंकजल पेशाले चिकित्सक हुन् ।

मधेशी आयोगले समेत गएकाे कात्तिकमा नेहाको घटनाबारे सत्यतथ्य छानबिन गरी दोषीलाई तुरुन्त कानुनी दायरामा ल्याउन प्रहरी प्रधान कार्यालयलाई पत्राचार गरेको थियाे ।