रामसहाय यादवद्वारा उपराष्ट्रपतिमा मत माग्न सुरु, दलका नेतृत्वसँग भेट्दै

२९ फागुन, काठमाडौं । आउँदो चैत ३ मा हुन गइरहेको उपराष्ट्रपति निर्वाचनका आठ दलीय गठबन्धनका तर्फबाट उपारष्ट्रपतिको उमेदवार बनेका जसपाका रामसहाय प्रसाद यादवले राजनीतिक दलसँग मत माग्न सुरु गरेका छन् ।

यादवले सोमबार प्रधानमन्त्री एवम् नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र नेकपा (एकीकृत समाजवादी)का अध्यक्ष माधव नेपाललाई भेटेर मग मागेका छन् ।

उनले सिंगो गठबन्धनको मत आउने गरी पहल लिन सहयोगका लागि यादवले आग्रह गरेका थिए । प्रधानमन्त्री प्रचण्डले यादवलाई आफूहरूको पूर्ण साथ र सहयोग रहने जवाफ दिएको जसपाका सांसद प्रदीप यादवले बताए ।

एकीकृत समाजवादीका अध्यक्ष नेपालले पनि गठबन्धनको साथ र सहयोग रहने आश्वसन दिएका थिए । उनले आफ्ना पार्टीका साथै सिंगो गठबन्धनको मत आउने गरी पहल गर्ने आश्वासन नेपालले दिएका थिए ।

उनले आजै राप्रपा अध्यक्ष राजेन्द्र लिङदेन र नेपाली कांग्रेस सभापति शेरबहादुर देउवालाई भेट्दैछन् । जसपाकी अर्की उम्मेदवार प्रमिलाकुमारीले उम्मेदवारी फिर्ता लिएपछि यादवलाई थप सहज भएको बताएको छ ।