बैंक र लघुवित्तविरुद्ध काठमाडौंकेन्द्रित प्रदर्शन चर्किँदै

३० फागुन, काठमाडौं । देशभरका उद्योग व्यवसायीहरूले काठमाडौंमा बैंक र लघुवित्तको ‘आतंक’विरुद्ध प्रदर्शनलाई तीव्रता दिएका छन् । आइतबारदेखि नै काठमाडौंकेन्द्रित आन्दोलनलाई उनीहरुले जोड दिएका हुन् । आज पनि उनीहरुले सरकार र राष्ट्र बैंंकविरुद्ध चर्का नारा र प्रदर्शन जारी राखेका छन् ।

बैंक र लघुवित्तले चरम रुपमा बढाएको ब्याज दर र सेवा शुल्कले आफूहरुको उठीबास लागेको भन्दै ऋणीलाई सडकमा पुर्याउने नीति तत्काल खारेज गर्न माग गरेका छन् ।

आज उनीहरुले माइतीघर मण्डला र राष्ट्र बैंकको केन्द्रीय कार्यालय बालुवाटारमा ब्यानर, प्लेकार्डसहित विभिन्न क्षेत्रमा व्यवसायी गर्दै आइरहेका उद्योग र व्यवसायीहरुले धर्ना दिइरहेका छन् ।

उद्योगी व्यवसायीहरुले कार्यालय समय सुरु भएदेखि नै बालुवाटारस्थित राष्ट्र बैंक घेराउ गरेका छन् । आफूहरुको पीडा बुझाउन घेराउ गरेको उनीहरुले बताएका छन् । घेराउमा मोरङ। काभ्रे, चितवन, झापा, ललितपुर, भक्तपुर लगायत ४० भन्दा बढी जिल्लाका उद्योगी–व्यवसायीहरु सहभागी छन् ।

उता, लघुवित्त वित्तीय संस्थाले चर्को ब्याज लिएर ऋणीलाई आत्महत्याको तहसम्म पुर्याइरहेको भन्दै पीडितहरुले आजै माइतीघर मण्डलामा विरोध जारी राखेका छन् । प्रदर्शनमा सहभागीहरुले लघुवित्त संस्थाविरुद्ध नारा लगाइरहेका छन् ।

ऋणीकाे पीडा सरकारले नसुनेपछि गाउँ गाउँबाट लघुवित्त संस्थाहरूको ज्यादतीको विरोध गर्न राजधानी आएको पीडितहरुले बताए । माग सुनुवाइ नभएसम्म संघर्ष जारी रहने लघुवित्त संस्था विरुद्धको संघर्ष समिति नेपालका अध्यक्ष मनिराम ज्ञवालीले बताए ।

लघुवित्तहरुले ग्रामीण निमुखा गरिब किसानलाई भुलभुलैयामा पारेर चर्को ब्याजमा ऋण बोकाई वित्तीय अपराध गरेको उनको भनाइ छ । सरकारले माग सुनुवाई तत्काल नगरे अवस्था विकराल बन्ने उनको भनाइ छ ।