पद धरापमा परेका प्रदेश प्रमुखहरूले भेटे प्रधानमन्त्री प्रचण्ड

१ चैत, काठमाडौं । विश्वासको मत र मन्त्रिपरिषद विस्तारको काम सकिए लगत्तै प्रदेश प्रमुखहरु फेर्ने सत्ता गठबन्धनको तयारी रहेकै अवस्थामा प्रधानमन्त्री पुषपकमल दाहाल ‘प्रचण्ड’सँग प्रदेश प्रमुखहरुले सामुहिक भेट गरेका छन । प्रधानमन्त्रीको निजी सचिवालयका एक सदस्यले दिएको जानकारी अनुसार प्रदेश प्रमुखहरुले प्रदेशमा देखिएका समस्याबारे जानकारी गराउन प्रधानमन्त्री प्रचण्डसँग भेट गरेका हुन् ।

बुधबार बिहान प्रधानमन्त्रीको सरकारी निवास बालुवाटारमा भएको भेटका क्रममा प्रदेश प्रमुखहरुले प्रदेश सरकारका समस्याहरुलाई जानकारी गराएका थिए । उनीहरुले संघीय सरकारले बनाउन कतिपय कानुन र योजनाका कारण प्रदेशमा रहेका सरकारहरु अन्योलमा परेको बताएका थिए । पुष १० मा नेकपा एमालेको सहयोगमा प्रचण्ड प्रधानमन्त्री बनेपछि प्रदेश सरकारहरु गठन भएका थिए । तर, अहिले समीकरण बदलिएर बनेको सत्ता गठबन्धनले संघीय सरकारको बिस्तारपछि नै प्रदेशमा सरकार फेरबदलको तयारी गरेको छ ।

प्रायः प्रदेशहरुमा यसअघिको सरकारको नतृत्व गरेको नेपाली कांग्रेसका सभापति शेरबहादुर देउवाको सरकारले परिवर्तन गरेका प्रदेश प्रमुखहरु अहिले पनि कार्यरत छन् । उनीहरु पद थमौतिका लागि प्रधानमन्त्रीसमक्ष आएको बताइएको छ । नीतिगत नभई व्यक्तिगत उदेश्य बोकेर काठमाडौं आएका प्रदेश प्रमुखहरूले आज बिहान प्रधानमन्त्री प्रचण्डसँग सामूहिक भेटवार्ता गरेर आफ्ना समस्या राखेका छन् ।प्रधानमन्त्री र प्रदेश प्रमुखहरूबीच भेटवार्ताबारे उनको सचिवालयले प्रदेशलाई बलियो बनाउन संघले गर्नुपर्ने सहयोगलगायत विषयमा पनि कुराकानी भएको जनाएको छ ।

देउवा नेतृत्वको सरकारले यसअघि सातै प्रदेशका प्रदेश प्रमुख फेर्ने लिएको थियो ति प्रदेश प्रमुखहरु पनि फेर्ने तयारी अहिले भइरहेको छ । सत्तारुढ गठबन्धनका शिर्ष नेताहरुबीच प्रदेश प्रमुख फेर्ने विषयमा छलफलसमेत भइरहेको छ । प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा समाजवादीका अध्यक्ष माधवकुमार नेपाल र नेपाली कांग्रेसका सभापति शेरबहादुर देउवालगायतका नेताहरुले प्रदेशमा दलअनुसार प्रदेश प्रमुख फेरबदल गर्ने रणनीति बनाएका छन् । यसअघि सत्तारोहण गरेको १५ दिनमै शेरबहादुर देउवाले पूर्ववर्ती सरकारले नियुक्ति गरेका प्रदेश प्रमुख हटाउने भन्दै राष्ट्रपति समक्ष सिफारिस गरेका थिए ।

२०७२ मा संविधान जारी भएसँगै ०७४ मंसिरमा पहिलो पटक प्रदेशसभा सदस्यको निर्वाचन भएको हो । चुनावपछि संघीय संरचना अनुरुप प्रदेश प्रमुखको अभ्यास कार्यान्वयन गर्दा सरकारको प्रधानमन्त्रीमा देउवा नै थिए । ३ माघ ०७४ मा पहिलोपटक सरकारले ७ वटै प्रदेशमा प्रमुखहरू नियुक्ति गरेको थियो । तर, ती प्रदेश प्रमुख दुई वर्ष पनि नपुग्दै दुईतिहाइ बहुमतसहितको ओली सरकारले बर्खास्त गरेर नयाँ नियुक्ति गरेको थियो । अहिलेसम्म कुनै पनि प्रदेशका प्रदेश प्रमुखले पूर्णकार्यकाल काम गर्न पाएका छैनन् ।