‘गुण्डा नाइके’ चक्रे मिलनविरूद्धको मुद्दामा सर्वोच्चमा सुनुवाइ सकियो

१ चैत, काठमडौं । सर्वोच्च अदालतमा ४ वर्षदेखि विचाराधीन रहेको ‘गुन्डा नाइके’ चक्रे मिलन भनिने मिलन गुरुङको सम्पत्ति शुद्धीकरणको मुद्दामा आज सुनुवाइ सकिएकाे छ ।

शुद्धिकरण मुद्दामा विशेष अदालतबाट सफाइ पाएपछि सरकारी वकिल कार्यालयको रायसहित सम्पत्ति शुद्धिकरण विभागले विशेषको फैसला बदरको मागसहित २०७५ जेठ ३० मा सर्वोच्चमा दायर गरेकाे पुनरावेदन रिटमा बुधबार सुनुवाइ भएको हाे । पेसी पालाे पहिलाे नम्बरमा परेकाे छ ।

पटकपटक पेसी सर्दै आइरहेको अवस्थामा योपटक भने सुनुवाई भएको छ । न्यायाधीशद्वय प्रकाशकुमार ढुङ्गाना र नहकुल सुवेदीको संयुक्त इजलासमा सुनुवाइ भएको हो । आदेश आउने बताइएको छ ।

विभागले सीआईबीको अनुसन्धान प्रतिवेदनको आधारमागुरुङ ५ जना ‘गुन्डा नाइके’हरु गणेश लामा, पर्शुराम बस्नेत, अभिषेक गिरी र दीपक मनाङ्गे भनिने राजीव गुरुङविरुद्ध २०७० जेठ ५ गते विशेष अदालतमा अवैध तरिकाले अकूत सम्पत्ति जोडेको आरोपमा मुद्दा दायर गरेको थियो ।

चक्रे मिलनले ८ करोड रुपैयाँ बराबरको अवैध सम्पत्ति आर्जन गरेको दाबी अभियोग पत्र छ । तर विशेषले अभियोग पुष्टी हुन नसकेको भन्दै २०७४ माघ १० मा भएको सुनुवाइपछि मिलन चक्रेलाई सफाइ दिने फैसला गरेको थियो । सो फैसला बदर गर्न सर्वोच्चमा दायर रिटमा माग गरिएको छ ।

पाँच जनामध्ये गण्डकी प्रदेशसभा सदस्य समेत रहेका दिपक मनाङेले भने सरकारी पक्षले सर्वोच्चमा पुनरावेदन नगरेपछि उनले उन्मुक्ति पाएका थिए ।

मिलनलाई एमालेकाे क्षेत्रीय कमिटीले गएको मंसिरमा भएको प्रतिनिधिसभाको चुनावमा गोरखा २ बाट सांसद उम्मेदवारमा समेत सिफारिस गरेको थियो । पछि केन्द्रले अब्दुस सलाम मियाँलाई टिकट दिएकाे थियाे । उनी पराजित भएका थिए ।