राष्ट्रपति पौडेलसँगको भेटमा उपसभापति गुरूङले भने- ‘सवारीका बेला गरिने तामझामलाई तोड्नुस्’

१ चैत, काठमाडौं । नेपाली कांग्रेसका उपसभापति धनराज गुरूङले राष्ट्रपति रामचन्द्र पौडेलसँग भेटेर बधाई तथा कार्यकाल सफलताको शुभकामना दिएका छन् । उपसभापति गुरुङले बुधबार शीतलनिवास पुगेर बधाई एवं शुभकामना दिएका हुन् ।

सो क्रममा गुरुङले राष्ट्रपतिको सवारीका बेला गरिने परम्परागत तामझामलाई तोड्न सुझाव दिएका छन् । सर्वसाधारणले पचाउन सक्ने तवरले सवारी सुरक्षाको प्रबन्ध अपनाउन र तामझाम गरेर सर्वसाधारणलाई दुःख दिने विगतका घटना नदोहोर्याउन सुझाव दिएको गुरुङको सचिवालयले जनाएको छ ।

जवाफमा राष्ट्रपति पौडेलले आफू त्यसमा प्रतिबद्ध रहेको बताएको सचिवालयले जनाएको छ । पौडेल गएको फागुन २५ मा राष्ट्रपति निर्वाचित भएका थिए । उनले यही सोमबार मात्र पँच वर्षे कार्यभार सम्हालेका हुन् ।