उपराष्ट्रपति निर्वाचन पनि बहिष्कार गर्ने राप्रपाकाे निर्णय

१ चैत, काठमाडौं । राष्ट्रिय प्रजातन्त्र पार्टीले उपराष्ट्रपति निर्वाचन पनि बहिष्कार गर्ने निर्णय गरेको छ । बुधबार बसेको पार्टीको केन्द्रीय कार्यसम्पादन समितिको बैठकले ३ चैतमा हुने उपराष्ट्रपति निर्वाचनमा सहभागी नहुने निर्णय गरेको प्रवक्ता मोहन श्रेष्ठले जानकारी दिए ।

यसअघि २५ फागुनमा भएको राष्ट्रपति निर्वाचनमा पनि राप्रपा सहभागी भएको थिए । राष्ट्रपति तथा उपराष्ट्रपति निर्वाचनका लागि राप्रपाका १४ संघीय सांसद र २८ प्रदेशसभा सदस्य मतदाता छन् ।

बैठकले सरकारले किसान दिँदै आएको रासायनिक मल अनुदान कटौती र मूल्य वृद्धि गर्ने सरकारको निर्णय अमानवीय भनेको छ । यो निर्णय तत्काल फिर्ता लिएर सहज रुपमा किसानलाई मल उप्लब्ध गराउन सरकारसँग माग गरेको छ ।

यस्तै राप्रपाले मलका विषयमा पार्टीको ७७ वटै जिल्ला समितिले एक हप्ताभित्र प्रमुख जिल्ला अधिकारीमार्फत सरकारलाई ज्ञापनपत्र बुझाउने, प्रशासन कार्यालयमा धर्ना दिने र देशभर विरोधसभा गर्ने निर्णय पनि गरेको प्रवक्ता श्रेष्ठले बताए ।

बैंक तथा वित्तीय संस्थाहरुले ऋणीसँग उठाइरहेको ब्याजदर तत्काल नियन्त्रण गर्न पनि बैठकले सरकारको ध्यानाकर्षण गराएको छ । आन्दोलनकारीहरुको माग सम्बोधन गर्न माग गरिएको छ ।