डीडीसीले बढायो दूधको उपभोक्ता मूल्य प्रतिलिटर ११ रुपैयाँ

१ चैत, काठमाडौं । सरकारी स्वमित्वको दुग्ध विकास संस्थान (डीडीसी)ले दूधको मूल्य लिटरमा ११ रुपैयाँले वृद्धि गरेको छ । बिहीबारदेखि लागू हुने गरी कृषि तथा पशुपन्छी विकास मन्त्रालयको लिखित सहमतिमा दूधको उपभोक्ता मूल्य बढाउने निर्णय गरिएको संस्थानका महाप्रबन्धक सञ्जिव झाले बताए । ८६ रुपैयाँ कायम रहेको मूल्य अबदेखि ९७ रुपैयाँ हुने उनले बताए ।

सरकारले गएको फागुन २६ मा वृद्धि गरेको दूधको किसानी मूल्य पनि बुधबार १ चैतदेखि लागू गर्ने निर्णय गरिएको उनले बताए । सरकारले किसानको दूधको मूल्य प्रतिलिटर ९ रुपैयाँ १० पैसा बढाउने निर्णय गरेको छ । वृद्धि मूल्य अनुसार अबदेखि किसानले एक लिटर दूधको मूल्य ६५ रुपैयाँ पाउनेछन् ।

दही, पनिर, घ्यू लगायतका दुग्ध पदार्थको मूल्य भने केही दिनमा तय गरिने उनले बताए । निजी डेरी कम्पनीहरुले भने सरकारले निर्णय गरेको भोलिपल्ट देखि नै प्रतिलिटर १४ रुपैयाँ बढाएर एक सय रुपैयाँ पुर्याइसकेका छन् ।

हरेक दुई दुई वर्षमा मात्र दूधको मूल्य बढाउन पाइने नियम भएपनि दूध उत्पादनमा कमी आएको कारण देखाउँदै एक वर्षमै डीडीसीले समेत उपभोक्तामारा नीति लिएको भन्दै विरोध भएको छ ।