एसियन हाइड्रोपावरको मूल्य १० प्रतिशतले बढ्यो

९ चैत, काठमाडौं । बिहीबार नेप्से परिसूचक १८.१५ अंकले घटेर १९१५.१४ बिन्दुमा आएर रोकिँदा एसियन हाइड्रोपावरको मूल्य १० प्रतिशतले बढेको छ । बिहीबार नेपाल स्टक एक्सचेञ्ज (नेप्से)मा कूल २५९ कम्पनीको ४३ लाख ४० हजार २७० कित्ता शेयर खरिद बिक्री हुँदा १ अर्ब ४१ करोड रुपैयाँ भन्दाबढीको कारोबार भएको छ।

बिहीबारदेखि नेप्सेमा एसियन हाइड्रोपावरको ‘एएचएल’ संकेतमा शेयर कारोबार सुरु भएको छ । शेयरबजार बन्द भएपश्चात हाइड्रोपावरमा करिब १० प्रतिशतले मूल्य बढेको छ ।

एसियन हाइड्रोपावरको पहिलो कारोबार प्रतिकित्ता २९८.८० रुपैयाँमा भएको हो । सोही भाउलाई आधार मानेर यसको नियमित कारोबार आजदेखि सुरु भएको छ । नेप्सेले यसको ओपनिङ रेन्ज प्रतिकित्ता ९९.६० रुपैयाँदेखि २९८.८० रुपैयाँ तोकेको थियो ।

कारोबारको आधारमा नेप्सेले तोकेको रेन्ज भन्दा २९.२० अंकले बढेर ३२८.६० विन्दुमा अडिएको छ । नेप्सेमा यस कम्पनीको शेयर बुधबार सूचीकृत भएको थियो ।