मन्त्रालय नपुग्दै पूर्णबहादुरमाथि उठ्यो राजनीतिमा इमान्दारिताको प्रश्न

१७ चैत,काठमाडौं । नेपाली कांग्रेसका तर्फबाट उपप्रधानसहित रक्षा मन्त्रालयको जिम्मेवारीमा पुगेका उपसभापति पुर्णबहादुर खडकामाथि पदभार ग्रहण नगर्दै कांग्रेस कार्यकर्ताहरुले राजनीतिमा इमान्दारिताको प्रश्न उठाएका छन् । उनले यसअघि कुनै पनि बहानामा आफना लागि पद सर्वोपरी नभएकाले सरकारमा नजाने र यसका लागि दवाव नदिन सर्वाजनिक रुपमा नै आह्वान गरेका थिए ।

उनी आज कांग्रेसबाट सरकारमा जाने मन्त्रीहरुहरुको नेतृत्व गर्दै राष्ट्रपतिसमक्ष शपथ लिएपछि उनको राजनीतिक इमान्दारितामाथि प्रश्न उठेको हो । सामाजिक सञ्जालमा कांग्रेस नेता तथा कार्यकर्ताहरुले पदका अगाडी खडकाले राजनीतिक इमान्दारितालाई तिलाञ्जली दिएको बताएका छन् ।

नेकपा माओवादीका अध्यक्ष पुष्पकमल दाहालको नेतृत्वको सरकारमा नेपाली कांग्रेसका तर्फबाट उपसभापति पुर्णबाहादुर खड्काले सत्ता समीकरण मिलाउन सुरुदेखि नै प्रयास गरेका थिए । सभापति शेरबहादुर देउवाले सुरुमा कांग्रेसबाट सरकारको नेतृत्व पुर्णबहादुरले गर्ने भन्दा उनले यसको विरोध गरेका थिए । लामोसमयसम्म पनि उनले कुनै पनि हालतमा पार्टीको नेतृत्व गरेर अहिलेको सरकारमा नजाने बताउँदै आएका थिए ।

सभापति देउवाको प्रस्ताव अश्विकार गदै उनले समाजिक सञ्जाल फेसबुक पेजमा निश्चित एजेन्डा र उदेश्यसहित सडक आन्दोलन–अदालतको कानूनी संघर्ष हुँदै निर्माण भएको लोकतान्त्रिक–बाम गठबन्धन प्रदेशसभा र प्रतिनिधिसभाको निर्बाचन सम्पन्न भएपछि षडयन्त्रको जालोमा पारिएर पुष १० गते भत्काइएको गठबन्धनलाई पुनःस्थापित गर्ने त्यही दिन राति गरेको दृढ संकल्पलाई लगभग पूरा गरिएको बताएका थिए ।

उनले भनेका थिए,‘सबैलाई प्रष्ट होस अब मेरो ब्यक्तिगत दाबी कुनै कुरामा छैन् । मेरो नाम अरुसँग जोडेर सरकारमा जाने दावी गरेको भनेर मिडिया र सामाजिक संजालमा सुरु गरिएका बहसलाई अघि बढाएर कृपया मलाई अन्याय नगरी दिनुहोस्, सबैमा अनुरोध छ’ तर त्यसको केही समय पनि वित्न नपाउँदै उनी आज कांग्रेसका तर्फबाट सरकारको नेतृत्वमा गएका छन् । उनी मन्त्री भएपछि आलोचना सुरु भएको छ । यद्यपि कांग्रेसले सबै मन्त्रीहरु भने पठाएको छैन ।

कांग्रेसको संस्थापन इतर समूहले सम्मानजानक स्थान नदिएको भन्दै आफ्नो समूहबाट नाम नपठाउने निर्णय गरेपछि कांग्रेसमा पनि विवाद देखिएको छ । आज उपसभापति पूर्णबहादुर खड्का उपप्रधान तथा रक्षामन्त्रीमा, डा. प्रकाशशरण महत अर्थमा, रमेश रिजाल उद्योग, वाणिज्य तथा आपूर्ति र सीता गुरुङले शहरी विकास मन्त्रीको शपथ लिएका छन् । अब कांग्रेसले चार मन्त्रालय पाउनेछ । स्वास्थ्य, परराष्ट्र, स्थानीय विकास तथा सामानन्य प्रशासन, कानुन न्याय तथा संसदीय मामिला  बन र युवा तथा खेलकुदमध्ये चार मन्त्रालय पाउनेछ ।

कांग्रेस सभापति शेरबहादुर देउवाका राजनीतिक कमान्डरको रुपमा चिनिने खड्का छैठौंपटक मन्त्री बन्दा उपप्रधानमन्त्रीको रुपमा बढुवा भएका छन् । खड्का गत पुस १० मा कांग्रेस र माओवादीबीच भड्किएको सम्बन्ध सुधार्दै एमालेलाई विपक्षी कित्तामा पु¥याएर पुरानो गठबन्धन ब्युँत्याउने डिजाइनर मध्येका एक हुन् । नयाँ सत्ता समीकरण निर्माणमा सक्रिय भूमिका खेलेका खड्का अहिले प्रचण्ड नेतृत्व सरकारमा कांग्रेसको नेतृत्व गर्दै सहभागी भएका हुन् ।

विगतमा उनी गृहमन्त्री भएकाले यसपटक पनि उनको त्यही चाहना थियो । तर कांग्रेस र माओवादी भागबन्डामा गृह मन्त्रालय माओवादीको भागमा परेपछि खड्का रक्षा मन्त्रालयको जिम्मेवारी सम्हालेर सरकारमा सामेल भएका हुन् । खड्काले विगतमा गृह, सूचना तथा सञ्चार, युवा, खेलकुद तथा संस्कृति, वातावरण र उद्योग वाणिज्यमन्त्री भएर काम गरेका थिए । यसपटक रक्षा मन्त्रालयको जिम्मेवारी लिएर छठौंपटक मन्त्री बनेका हुन् ।

कांग्रेसको तत्कालीन नेता खुमबहादुर खड्काको समूहबाट कांग्रेसको केन्द्रीय राजनीतिमा उदाएका उनी सहमहामन्त्री, महामन्त्री अहिले उपसभापति छन् । ०७४ मा खुमबहादुरको निधनपछि देउवाले उनलाई २१ वैशाख, ०७५ मा महामन्त्री मनोनीत गरेका थिए । अब पार्टीको उपसभापतिमा निर्वाचित भएपछि खड्का कांग्रेसमा झन् शक्तिशाली बनेका छन् ।

कांग्रेसबाट १३ औं महाधिवेशनमा केन्द्रीय सदस्य बनेका खड्कालाई देउवाले पार्टीको महामन्त्री मनोनित गरेका थिए । त्यसपछि उनको राजनीतिक भूमिका बढ्दै गयो । देउवाका विश्वास पात्र मध्येका एक विमलेन्द्र निधिले देउवालाई नै चुनौती दिँदै १४ औं महाधिवेशनमा सभापतिमा उम्मेदवारी दिएपछि त देउवा समूहमा खड्काको प्रभाव झन् बढ्यो । त्यसैले अहिले देउवाले लिने सबैजसो राजनीतिक निर्णयमा खड्काको भूमिका रहन्छ । खड्का नै देउवाका रणनीतिक योजनाकार जस्ता मध्येका हुन् ।