स्वास्थ्य क्षेत्रमा ३ अर्ब लागतको वित्तीय प्रबन्ध परियोजना सुरु

२० चैत, काठमाडौं । यूएसएआईडी र स्वास्थ्य तथा जनसंख्या मन्त्रालयबीचको साझदारीमा स्वास्थ्य क्षेत्रमा प्रत्यक्ष वित्तीय प्रबन्ध परियोजनाको सुरुवात भएको छ । नेपालस्थित अमेरिकी अन्तर्राष्ट्रिय विकास नियोग यूएसएआईडीले सोमबार नेपालको स्वास्थ्य तथा जनसंख्या मन्त्रालयसँगको साझेदारीमा उक्त परियोजनाको सुरुवात गरेको हो । उक्त परियोजनाको बजेट करिब ३ अर्ब २७ करोड रुपैयाँ रहेको छ ।

यस परियोजनाले दसौं लाख नेपालीको स्वास्थ्य सुधारका निम्ति काम गर्ने बताइएको छ । संघीय स्वास्थ्य तथा जनसंख्या मन्त्रालय, कर्णाली प्रदेशको सामाजिक विकास मन्त्रालय र सोही प्रदेशका तीन स्थानीय तहलाई वित्तीय सहायता प्रदान गरिने अमेरिकी दूतावासद्वारा जारी विज्ञप्तिमा उल्लेख छ । दूतावासले यस साझेदारीले नेपाली नागरिकहरूलाई उचित, उत्तरदायी र दिगो स्वास्थ्य सेवा प्रदान गर्न संघीय र उपराष्ट्रिय तहहरूमा नेपाल सरकारको स्वास्थ्य प्रणालीको सुदृढीकरण गर्ने जनाएको छ ।

यसले नेपालीहरूलाई गुणस्तरीय स्वास्थ्य सेवामा समतामूलक पहुँच दिलाउन नेपाल स्वास्थ्य क्षेत्र रणनीतिक योजनाका लक्ष्यहरू हासिल गर्न सरकारलाई सहयोग गर्ने बताइएको छ । परियोजनामार्फत यूएसएआईडीले विकट भौगोलिक क्षेत्र तथा सीमान्तकृत समुदायहरूमा जीवनयापन गरिरहेका जनताले गुणस्तरीय स्वास्थ्य सेवामा पहुँच पाउने र उनीहरू आकस्मिक अवस्था, तनाव तथा धक्काहरू सम्बन्धी तयारी र प्रतिकार्य गर्न अझ बढी सक्षम भएको सुनिश्चित गर्न नेपाल सरकारसँग सहकार्य गर्ने भनिएको छ ।

दूतावासले यो साझेदारी नेपालको स्वास्थ्य क्षेत्रमा दशकौं लामो अमेरिकी सहयोगका साथै कोभिड–१९ महामारीको समयमा नेपाल सरकारलाई मद्दत गर्दाको निकट अनुभवमा आधारित रहेको जनाएको छ । नेपालको स्वास्थ्य क्षेत्र र विकासमा सहयोग गर्न अमेरिका प्रतिबद्ध रहेको र यूएसएआईडीको स्वास्थ्य क्षेत्रमा प्रत्यक्ष वित्तीय प्रबन्ध परियोजना सबै नेपाली नागरिकहरूका लागि उचित र सुदृढ स्वास्थ्योपचार सेवा हासिल गर्न महत्त्वपूर्ण कदम रहेको बताइएको छ ।