सीजीको बीप एप सार्वजनिक, एकैपटकमा १० जनाले भिडियो कल गर्नसक्ने

काठमाडौं । चौधरी ग्रुपअन्तर्गत सीजी लाइफसेलले बीप एप सार्वजनिक गरेको छ । यो एपमार्फत एकैपटकमा १० जनासम्मले भिडियो कल गर्नसक्ने भएका छन् ।

विश्वभर साढे तीन करोड प्रयोगकर्ता रहेको यो एपबाट भ्वाइसकल, म्यासेज, डकुमेन्ट आदानप्रदानसँगै विनियम दर, मौसमसम्बन्धी जानकारी, समाचारलगायतका बारेमा जानकारी लिनसक्ने कम्पनीका प्रबन्ध निर्देशक निर्वाण चौधरीले बुधबार पत्रकार सम्मेलन मार्फत जानकारी गराए ।

टर्की, जर्मनीलगायत विभिन्न देशमा प्रयोग गरिँदै आएको यो एप प्रयोगकर्ताले आफ्नो भाषा अनुसारको सेटिङ मिलाएर चलाउन सक्ने कम्पनीले जनाएको छ ।

त्यस्तै, एपमा विभिन्न गेम निशुल्क डाउनलोड, लोकेसन शेयर, फलो मी र डिस्कभरी च्यानललगायत विशेषता रहेको पनि कम्पनीले जनाएको छ । बीप एपलाई ल्यापटप र डेस्कटपमा पनि प्रयोग गर्न सकिन्छ ।

कम्पनीका अनुसार एपमा रहेको सरप्राइज पोइन्टमार्फत सेवाग्राहीले विभिन्न आकर्षक उपहार जित्न सक्नेछन् ।