एसईईमा अर्कैकाे नाममा परीक्षा दिनेको बिगबिगी, पक्राउ पर्ने नक्कली परीक्षार्थीकाे संख्या कति पुग्याे ?

२३ चैत, विराटनगर । जारी एसईईमा नक्कली परीक्षार्थीको बिगबिगी बढेको छ । सबैभन्दा बढी मात्रामा माेरङमा भेटिएका छन् । आज र हिजो गरी मोरङको ३ वटा परीक्षा केन्द्रबाट दर्जनाैं संख्यामा अर्कैको नाममा परीक्षा दिने नक्कली परीक्षार्थीहरु पक्राउ परेका छन् । 

झोराहाट, केराबारी र हरैचाबाट मात्र १९९ आज सामाजिक विषयको परीक्षा दिने नक्कली परीक्षार्थी भेटिएको मोरङ प्रहरीले बतायो । 

ग्रामथान गाउँपालिका २ झोराहाटबाटस्थित श्री सरस्वती नमूना माविको परीक्षा केन्द्रबाट बिहान सामाजिक विषयको परीक्षा दिँदै गरेका ५२ जना ‘नक्कली’ परीक्षार्थी पक्राउ परेका छन् ।

यस्तै सार्वजनिक मावि केराबारीबाट १२७ जना र जनता मावि सुन्दरहरैचाबाट २० जनालाई नक्कलीको आशंकामा प्रहरीले पक्राउ गरेको छ ।  ठूलो संख्यामा  ‘नक्कली’ परीक्षार्थी फेला परेपछि सुक्ष्म रुपमाअनुसन्धान भइरहेको मोरङका डिएसपी रञ्जनकुमार दाहालले बताए । 

बुधबार मात्र ग्रामथान गाउँपालिका–२ मा रहेको सरस्वती माध्यमिक विद्यालय परीक्षा केन्द्रबाट कल्पना लिम्बूको अनिवार्य विज्ञान विषयमा परिक्षा दिइरहेको अवस्थामा सुनसरीको धरान उपमहानगरपालिका–५ की २८ वर्षीया सुस्मिता लिम्बूलाई प्रहरीले पक्राउ गरेको थियो । उनले कल्पनाको परीक्षा सिम्बोल नं. ००९१२४९७ बाट परीक्षा दिइरहेकी अवस्थामा गोप्य सूचनाका आधारमा पक्राउ गरिएको थियो । उनीमाथि अनुसन्धान भइरहेको प्रहरीले जनाएको छ । 

यसअघिका निश्चित अंक (माक्र्स) ल्याउने मात्र उत्तिर्ण हुने प्रणालीलाई हटाएर लेटर ग्रेडिङ प्रणालीमा परीक्षा सुरु गरेको अवस्थामा पनि नक्कली परीक्षार्थीको बिगबिगी देखिनुलाई गम्भीर रुपमा लिइएको छ ।