सांसद खतिवडाको प्रश्न : ओखलढुंगाबासीलाई जस्तापाताको सपना किन बाँडियो ?

 २३ चैत, काठमाडौं । नेपाली कांग्रेसका सांसद रामहरि खतिवडाले ओखलढुंगामा रहेका खरको छाना तत्काल विस्थापित गराउन माग गरेका छन् ।

बिहीबार प्रतिनिधिसभाको बैठकमा शून्य समयमा बोल्दै सरकारले खरको छाना विस्थापित गराउन जस्ता पाता वितरण गर्ने नीति लिएको घोषणा गरेको वर्षौ भइसकेको औल्याउँदै तत्काल जस्तापाता वितरण गर्न सरकारको ध्यानाकर्ष गराए । जिल्लामा अझै ६ हजार भन्दा बढी खरकाे छाना रहेकाे उनकाे भनाइ थियाे ।

‘सरकारले खरको छाना हटाएर जस्तापाताको छाना निर्माण गरिदिने सपना बाँडियो, तर सपना कुल्चेर सरकार कता हरायो ?’ सांसद खतिवडाले प्रश्न गरे । 
उनले घुर्मी हुँदै सदरमुकाम पुग्ने ४७ किमि सडक पार गर्न ६ घण्टा लाग्ने गरिएको बताउँदै तत्काल सडक स्तरोन्नति गर्न सम्बन्धित निकायको ध्यानाकर्षण गराए ।