कांग्रेससँगको गठबन्धनबारे प्रधानमन्त्रीले भने- ‘जहाँ गएर ल्याण्ड हुनुपर्ने थियो त्यहीँ भयाे’

२४ चैत, गोरखा । प्रधानमन्त्री पुष्पकमल दाहाल ‘प्रचण्ड’ले सरकारको एक सय दिन राजनीतिक उतारचढावमै बितेको बताएका छन् । उनले राजनीतिक उतारचढावकै कारण सरकारको नेतृत्व लिएको १०० दिनसम्म ठोस काम गर्न नसकेको स्वीकारेका छन् । 

गोरखा अस्पतालको स्वर्ण जयन्ती समारोहमा आज मुख्य अतिथिको रुपमा बोल्दै उनले उचारचढावमय अवस्था सकिएको र अबका दिनमा विकास निर्माणसँगै अन्य काम सरकारले द्रूत गतिमा गर्ने बताए । 

उनले कांग्रेससँगको गठबन्धनबारे बताउँदै भने, ‘जहाँ गएर ल्याण्ड हुनुपर्ने थियो त्यहीँ भएको छ, सबैका निम्ति खुशीको कुरा हो ।’ उनले गोरखाको विकासुका लागि कुनै कसर बाँकी नराख्ने आश्वसन दिए । गोरखाका निर्वाचित भएको सांसदहरु प्रधामन्त्री, उपप्रधान तथा गृहमन्त्री, मन्त्री, मुख्यमन्त्री बनेका बेला गोरखाका विकास नभएर कहिल्यै नहुने उनको भनाइ थियो । उनले सरकारले ल्याएको न्यूनतम साझा कार्यक्रममा विकास नमूना र नयाँ धारा समेटिएको बताए । 

साथै सरकार नीति, कार्यक्रम र बजेट निर्माणको काममा लागिसकेको बताए । आउने बजेटले परम्परागत बिकासको मोडेललाई भत्काएर नयाँपन ल्याउने गरी बाटो खोल्ने उनको भनाइ थियो । 

समारोहमा सहभागीहरुले गोरखामा थुप्रै स्थानमा सडक र ठूला आयोजनाहरु अलपत्र अवस्थामा रहेको र यसलाई पूरा गरेमात्र पनि धेरै राम्रो हुने चर्चा गरेका थिए ।

प्रधानमन्त्री प्रचण्डले आजै अर्को कार्यक्रममा जिल्लाका पार्टीका नेता कार्यकर्ताहरुसँग अन्तर्क्रिया गरेका थिए ।