नयाँ स्टक र ब्रोकर लाइसेन्स रोक्न माग गरिएको रिट खारेज

२६ चैत, काठमाडौं । सर्वोच्च अदालतमा परेको नयाँ स्टक एक्सचेन्ज र ब्रोकर लाइसेन्स रोक्न माग गरिएको रिट खारेज भएको छ ।

धितोपत्र बजारको नयाँ ब्रोकर, स्टक एक्सचेन्ज र कमोडिटी एक्सचेन्जको लाइसेन्स वितरण गर्ने सरकारले निर्णय खारेजीको माग गर्दै अविक्ता दीपकविक्रम मिश्रले गत आसोज ३१ मा दायर गरेको रिट आइतबार अनिलकुमार सिन्हा र सुष्मालता माथेमाको संयुक्त इजलासले सुनुवाइपछि खारेजी गर्ने निर्णय सुनाएको हो । रिटमा प्रधानमन्त्री एवं मन्त्रिपरिषदको कार्यालय लगायतलाई विपक्षी बनाइएको थियो । 

खारेजीको आदेशसँगै धितोपत्र बजारको नयाँ ब्रोकर, स्टक एक्सचेन्ज र कमोडिटी एक्सचेन्जको लाइसेन्स वितरण बाटो खुलेको छ । 

नेपाल धितोपत्र बोर्डले एक स्टक एक्सचेन्ज, दुई कमोडिटी एक्सचेन्ज र संख्या नखुलाई ब्रोकर लाइसेन्स वितरणका लागि गत भदौमा धितोपत्र बजार सञ्चालन नियमावली, २०६४ को दोस्रो संशोधन र धितोपत्र व्यवसायी (धितोपत्र दलाल तथा धितोपत्र व्यापारी) नियमावली, २०६४ चौथो संशोधन गरेर स्वीकृतिका लागि मन्त्रिपरिषदमा प्रस्ताव पठाएको थियो । 

उक्त प्रस्तावलाई मन्त्रिपरिषद् बैठकले स्वीकृति दिने निर्णय गरेको थियो । तर निर्णय बदरको माग गर्दै मिश्रले रिट दायर गरेका थिए ।