काठमाडौँ महानगरभित्रका सामुदायिक विद्यालयलाई शुल्क उठाउन बन्देज

३० चेत, काठमाडौं । काठमाडौं महानगरपालिकाले महानगरभित्रका सामुदायिक विद्यालयलाई कुनैपनि शीर्षकमा शुल्क उठाउन बन्देज लगाइएको छ । 
महानगरको शिक्षा विभागका शिक्षा अधिकारी रामप्रसाद सुवेदीले बुधबार एक सूचना जारी गर्दै महानगरभित्रका सामूदायिक विद्यालय प्राथमिक, निमावि र माविलाई कुनैपनि किसिमका शूल्क नउठाउन निर्देशन दिएका हुन् । 

शिक्षा ऐन, २०२८ ९संशोधनसहित)को दफा १६ (घ) को उपदफा (क)मा कुनै अभिभावकले आफ्नो इच्छाले सामुदायिक विद्यालयलाई दिएको दान, उपहार, चन्दा वा सहयोग लिन सकिनेछ भन्ने व्यवस्थाको गलत प्रयोग गर्दै कतिपयले विद्यालयले अभिभावकबाट शुल्क असुलेको भन्दै महानगरले कुनैपनि शुल्क नलिन निर्देशन दिएको हो । 

अभिभावकबाट ती विद्यालयहरुलाई उपहार, दान वा सहयोग भने दिन रोक नलाग्ने जनाइएको छ । अभिभावकको इच्छाविपरीत विद्यालयहरुले विभिन्न शीर्षकमा शुल्क लिइरहेको भन्ने गुनासो विभागमा आउने क्रम नरोकिएपछि विभागले यस्तो निर्देशन दिएको हो ।

नयाँ शैक्षिक सत्रको सुरुवाती चरणमा निजी विद्यालयले मात्र नभई सामूदायिक विद्यालयहरुले मनपरी शुल्क असुलिरहेको समाचार आइरहेका बेला महानगरले शुल्क उठाउने कार्य नियमविपरीत भएको भन्दै  प्रतिबन्धात्मक निर्देशन दिएकाे हाे ।