चितवनको चौकीडाँडामा प्याराग्लाइडिङ्ग सुरु

१ वैशाख, चितवन । चितवनमा प्याराग्लाइडिङ सुरु भएको छ । सफारी पर्यटनको रुपमा परिचित चितवनमा प्याराग्लाइडिङ सेवा पनि सुरु भएको हो । साहसिक खेल पर्यटनको रूपमा चिनिने प्याराग्लाइडिङ भरतपुर महानगरपालिका–२९ को चौकीडाँडाबाट व्यवसायिक रुपमा सुरु भएको छ । 

नयाँ वर्ष २०८० को पहिलो दिनको अवसर पारेर उडान सुरु गरिएको हिमालयन फन्टियर्स प्याराग्लाइडिङ कम्पनीका बोर्ड डाइरेक्टर शालिक दवाडीले जानकारी दिए । 

चौकीडाँडाबाट प्याराग्लाइडिङ उडेर तनहुँको देवघाट गाउँपालिका–५ मा रहेको त्रिशूली नदीको किनारमा अवतरण हुने जानकारी उनले दिए । 

कति पर्छ शुल्क ?

प्याराग्लाडिङ्ग उडानका लागि लाग्ने ८ हजार रुपैयाँ तोकिएको छ । यसमा नयाँ वर्षको अवसरमा २५ प्रतिशत छुट दिएर ६ हजार शुल्क लिइएको बोर्ड डाइरेक्टर दवाडीले बताए । उनका अनुसार दैनिक ४५ जनासम्मलाई उडान सकिने गरी तयारी गरिएको छ । हाल १० वटा प्याराग्लाइडिङ्ग उडानमा १० पाइलट नै राखिएका छन् । 

कति छ उचाइ ?

१२ सय मिटरको उचाइमा रहेको चौकीडाँडाबाट आन्तरिक र बाह्य पर्यटकले प्याराग्लाइडिङको आनन्द लिन सकिने कम्पनीका अध्यक्ष विजय घलेले बताए । प्याराग्लाइडिङका लागि १.८५ नोटिकल माइल वरपर उडान गर्ने अनुमति पाएको छ भने सिधै माथि ५ हजार मिटरसम्म जान पाइनेछ । उडान सुरु गरेर २० मिनटेमा त्रिशूलीमा किनारामा झर्न सकिनेछ । ।

मुग्लिन–नारायणगढ सडकखण्डको भोर्लेबाट ९ किलोमिटर उत्तर र जुगेडीबाट ५ किलोमिटर उत्तर हिँडेपछि चौकीडाँडा पुग्न सकिनेछ । ५ बिघामा फैलिएको कम्पनीको भौतिक संचरनामा ७० करोड लगानी हुने अध्यक्ष घलेको भनाइ छ । प्लाराग्लाइडिङ यसअघि पोखरामा मात्र सीमित थियो ।