जनआक्रोस कम गर्न कांग्रेस शुद्धीकरण गर्नुपर्छः सिंह

३ वैशाख, झापा । नेपाली कांग्रेसका नेता प्रकाशमान सिंहले कांग्रेसले सही राजनीति नगर्दा जनता कांग्रेसप्रति आक्रासित भइरहेको बताएका छन् । उनले आफुले भरोसा गरेको कांग्रेसले सही समयमा सही निर्णय लिएर काम गर्न नसकेको भन्दै कांग्रेस पार्टीका कामप्रति आक्रासित जनताले पार्टिका कमीकमजोरीलाई शुद्धीकरण गर्दै जनअपेक्षा पूरा गर्नुपर्ने बताएका छन् ।

आइतबार झापामा आयोजित एक कार्यक्रममा उनले आन्तरिक कमजोरी सच्याउँदै पार्टीलाई बलियो बनाउनुपर्ने र जनअपेक्षा पूरा गर्नुपर्ने बताए । परिवारका सदस्य आफ्नो अभिभावकप्रति नै बढी आशावादी हुने भन्दै उनले जनताको आश पनि कांग्रेसप्रति नै रहेको बताए । जनताले कांग्रेसका अहिलेका नेताहरुलाई संस्थापक नेताहरुसँग तुलना गरेर हेर्ने गरेकाले भरोसायोग्य पार्टी बनाउनुपर्नेमा  जोड छ ।

कांग्रेस नेताहरुले आफूलाई समय अनुकूल बनाउन नसके गाह्रो पर्ने उनको भनाइ छ । कार्यक्रममा उनले भने, ‘प्रजातन्त्र ल्याउन, जनतालाई अधिकार दिलाउन सबैभन्दा बढी संघर्ष गरेको पार्टी नेपाली कांग्रेस भएकाले कांग्रेसप्रति जनताको आशा बढी छ । त्यसैले अरु राजनीतिक दलहरुभन्दा बढी जिम्मेवारीपूर्ण तवरले हाम्रो गतिविधि हुनुपर्छ ।’ संगठनको सुदृढीकरणमा बढी जोड दिनुपर्ने उनले बताए ।