१७ खर्बभन्दा तलको बजेट बनिरहेको अर्थमन्त्रीको ब्रिफिङ

१३ वैशाख, काठमाडौं । अर्थमन्त्री डा. प्रकाशशरण महतले कांग्रेसको संसदीय दलमा आगामी बजेट १७ खर्चभन्दा तल हुने ब्रिफिङ गराएका छन् । उनले आन्तरिक स्रोत अहिले सबैभन्दा कम उठिरहेकाले राजश्व संकलनलाई विशेष प्रामिकतामा दिइएको जानकारी गराएका छन् । अहिले राजश्व लक्ष्य अनुसार नभएकाले आन्तरिक खर्च निकै चापमा परेको उनको भनाइ थियो । 

नेपाली कांग्रेसको संसदीय दलमा दुई दिन चलेको आगामी बजेटबारेको छलफलमा अधिकांश सांसदले सांसद विकास कार्यक्रम राख्न अर्थमन्त्री प्रकाशशरण महतलाई दवाव दिएका छन् । अहिले प्रदेशका संसदलाई मात्र यो कार्यक्रम दिइएको छ । प्रदेशका सांसदले सांसद क्षेत्र विकास कार्यक्रम पाउने र संघीय सांसदले नपाउने हुँदा संघीय सांसदलाई निर्वाचन क्षेत्रमा जान समस्या भइरहेको उनीहरुको गुनासो छ । 

बजेटका प्राथमिकताका विषयमा सांसदहरुको राय लिन सोमबार र मंगलबार दुई दिन संसदीय दलको बैठक बोलाइएको थियो । बजेटमाथि केन्द्रित छलफलमा उपनिर्वाचनका सन्दर्भमा पनि सांसदहरुले धारणा राखेका थिए ।  विकासका कार्यमा लागिरहेको व्यक्ति भए पनि पुराना दलले जित्न नसकिने अवस्था निर्माण भएको चिन्ता बैठकमा गरिएको गरिएको थियो । नयाँ दलले गरेको प्रचार अभियानका अगाडी कांग्रेस कमजोर भएकाले पनि पराजित हुनुपरेको नेताहरुले गुनासो गरेका थिए । 

बैठकमा अर्थमन्त्री डा. प्रकाशशरण महतले बजेटका लागि स्रोत र साधनको अभाव रहेको सांसदहरुलाई सुनाएका थिए । बैठकमा सहभागी अधिकांश सांसदले सांसद विकास कार्यक्रमलाई निरन्तरता दिनुपर्ने माग गरेका थिए । प्रतिनिधिसभाका सांसदका लागि सांसद विकास कार्यक्रम नहुने हो भने प्रदेशमा पनि हुन नहुने तर्क उनीहरुको छ । बैठकमा सहभागी एक सांसदले दिएको जानकारी अनुसार प्रदेशका सांसदका लागि विकास कार्यक्रम बजेटमा समावेश हुँदा संघका सांसदलाई पनि व्यवस्था हुनुपर्यो भन्ने माग उठेको थियो ।  

छलफलका क्रममा अर्थमन्त्री महतले आगामी आर्थिक वर्ष २०८०÷८१ को बजेट १६ खर्ब हारहारीमा बनिरहेको जानकारी दिएका थिए । अर्थमन्त्री संसदीय दलको कार्यालयमा बजेट सम्बन्धी ब्रिफिङ गर्दै यस्तो जानकारी गराएका हुन् ।  सरकारको स्रोत खुम्चिएको अवस्थामा खर्चको दायरा समेत घटाउनुपर्ने बाध्यताकाबीच आगामी आर्थिक वर्षको बजेट १६ खर्बको सीमा झार्न लागिएको डा.महतको भनाइ थियो ।

राष्ट्रिय योजना आयोगले १६ खर्ब ८८ अर्ब रुपैयाँ बराबरको निश्चित सीमाभित्र रहेर बजेट ल्याउन अर्थ मन्त्रालयलाई निर्देशन गरिसकेको र यही अनुसार तयार ीभइरहेको महतले जानकारी गराएको एक नेताले बताए । महतको भनाई अनुसार १६ खर्ब चालू आर्थिक वर्षको बजेटभन्दा १ खर्ब ५ अर्ब रुपैयाँले कम हो ।  चालू आर्थिक वर्षका लागि सरकारले कूल १७ खर्ब ९३ अर्ब ८३ करोड ७३ लाख रुपैयाँ बराबरको बजेट ल्याएको थियो । 

खर्चको स्रोत घटेसँगै सरकारले आगामी आर्थिक वर्षको बजेटमा साना फुटकर आयोजनाहरुको खर्च कटौती गर्ने नीति लिने अर्थमन्त्री डा.महतको भनाइ छ । प्राथमिकतामा रहेका र बहुवर्षीय ठूला आयोजनाहरुलाई निरन्तरता दिएर स्रोत अपुग आयोजनाहरुलाई स्थगित गरिने समेत अर्थमन्त्री डा.महतले बताएका छन् । उनले आगामी बजेट सांसद विकास कार्यक्रम राख्न नसकिने जानकारी सांसदहरुलाई गराएका छन् ।