लुम्बिनीका विद्युतीय गाडीमा हरियो प्लेट सेताेमा परिवर्तन, भाडामा चलाउन दिइने

१४ वैशाख, बुटवल । लुम्बिनीमा साढे दुई वर्षदेखि त्यतिकै थन्किएका विद्युतीय गाडी सञ्चालन गर्न बाटो खुला भएको छ ।

लुम्बिनी प्रदेश सरकारले सेतो नम्बर प्लेटमा रहेका ती गाडीहरू हरियो नम्बर प्लेटमा रूपान्तरण गरी सञ्चालनको स्वीकृति प्रदान गर्ने निर्णय गरेपछि वर्षौंदेखि थन्काएर राखेका गाडीहरू सञ्चालन गर्ने बाटो खुलेको हो ।

२०७७ साल मंसिर ९ मा लुम्बिनीलाई प्रदूषणमुक्त बनाउन भन्दै एसियाली विकास बैंकको १३ करोड रुपैयाँ अनुदानमा १४ वटा विद्युतीय भ्यान र पाँच वटा विद्युतीय बस खरिद गरिएको थियो । ति गाडी लुम्बिनी विकास कोषले सञ्चालन गर्ने भएको छ । 

एडिबीले सरकारलाई हस्तान्तरण गरेका सबै गाडी कोषलाई हस्तान्तरण गरे पनि सेतो नम्बर प्लेटमा रहेका थिए । सरकारी सेतो नम्बर प्लेटका गाडीलाई सरकारी कामबाहेक पर्यटक वा यात्रुहरू बोक्ने काममा प्रयोग गर्न नपाइने कानूनी व्यवस्था छ । 

लुम्बिनी प्रदेशका मुख्यमन्त्री लिला गिरी नेतृत्वको सरकारले उद्योग, पर्यटन तथा यातायात मन्त्रालयको प्रस्तावमा वैशाख ८ गते बसेको मन्त्रिपरिषद्को बैठकले कोषका ५ वटा विद्युतीय बस र १४ वटा भ्यानलाई सेतो नम्बर प्लेटबाट हरियो नम्बर प्लेटमा रूपान्तरण गरी सेवा प्रदान स्वीकृति प्रदान गर्ने निर्णय गरेको हो ।

निर्णयबमोजिम प्रदेशको सेतो नम्बर प्लेटका गाडीहरू हरियो नम्बर प्लेटमा रूपान्तरण गर्न यातायात व्यवस्था कार्यालय सवारी रुपेन्देहीप्लई निर्देशन दिइसकेको छ । सरकारले गरेको उक्त निर्णयको कार्यान्वयनमा आएको पत्र बुधबार प्राप्त भएको लुम्बिनी विकास कोषले जनाएको छ ।

एसियाली विकास बैंकको अनुदान सहयोगमा क्लिन इनर्जी प्रोजेक्टअन्तर्गत १४ वटा विद्युतीय भ्यान र पाँच वटा विद्युतीय बस, सोलार प्लाण्ट र चार्जिङ स्टेसनमा गरी ३५ करोड लगानी भएको विकास कोषले जनाएको छ ।

क्लिन इनर्जीले गाडी नेपाल ल्याउँदा भन्सार शुल्क मात्रै ८ करोड रुपैयाँ बुझाएको थियो । वातानुकूलित, अपांगतामैत्री र स्वचालित ढोका सहितका बसमा १९ सिट क्षमता छ भने भ्यान पाँच सिटका छन् ।

एक पटक पूरा चार्ज गरेपछि चार सय किलोमिटरसम्म गुड्न सक्ने क्षमता रहेका बसरभ्यानमा कार्डबाटै रकम भुक्तानी गर्ने सुविधा समेत छ ।
एडिबीले लुम्बिनी जाने पर्यटकहरूलाई सहज सेवा दिने उद्देश्यले उपलब्ध गराएका गाडीहरू भाडा लिएरै सञ्चालन गर्ने विकास कोषले जनाएको छ।