अर्थतन्त्र संकटमा रहेको सरकारका प्रवक्ताकाे स्वीकाराेक्ति, सुधारको प्रयासमा सरकार लागिरहेको दाबी

१४ वेशाख, दाङ । सरकारी प्रवक्ता एवं सञ्चार तथा सूचना प्रविधिमन्त्री रेखा शर्माले देशको आर्थिक अवस्था कमजोर अवस्थामा पुगेकाले सरकारको ध्यान अर्थतन्त्र सुधारमा भएको बताएकी छन् । 

बिहीबार प्रेस सेन्टरले घोराहीमा आयोजना गरेको पत्रकार भेटघाटमा बोल्दै मन्त्री शर्माले अत्यन्त कमजोर अवस्थामा पुगेको देशको अर्थतन्त्रलाई सुधार गर्न सरकार निरन्तर लागिरहेको सुनाइन् । उनको अभिव्यक्तिले मुलुकको अर्थतन्त्र संकटमा रहेको पुष्टि गरेको छ । यसअघिसम्म प्रधानमन्त्री प्रचण्ड, अर्थमन्त्री प्रकाशशरण महत तथा गर्भनर महाप्रसाद अधिकारीले अर्थतन्त्र संकटमा परेको कुरा हल्ला मात्र भएको भन्दै खण्डन गर्दै आएका थिए् ।

‘अहिले देशको आर्थिक अवस्था अत्यन्त कमजोर अवस्थामा पुगेको छ । बिग्रिएको अर्थतन्त्र सुधार्न सरकारले नीति निर्णयसहित अगाडि बढिरहेको छ’ उनले भनिन् । उले आगामी बजेटको सिलिङ कटौति हुने संकेत समेत दिइन् । सरकारले उत्पादन र प्रतिफल दिने योजनालाई प्राथमिकतामा राखेको बताइन् । अर्को प्रसंगमा उनले सरकारले छिट्टै संक्रमणकालीन न्यायसम्बन्धी विधयेकलाई संसदमा पारित गर्ने बताइन् । 

यस्तै, मन्त्री शर्माले दाङको घोराही–तुलसीपुर ४ लेन सडक आयोजनाको काम नयाँ ढङ्गबाट थालनी गर्ने प्रक्रिया अघि बढेको बताइन् । उक्त सडक लेन निर्माणमा भारतीय एक्जिम बैङ्कको लगानीमा भारतीय निर्माण कम्पनीले नै ठेक्का पाएको छ । लामो समयदेखि सडक निर्माण हुन नसक्दा दुर्घटना दर बढेर दर्जनौं नागरिकको ज्यान गइसकेको र पैदल यात्रुलाई आवतजावतमा धुलो र धुवाँले कष्टप्रद बनेको गुनासो छ । असारभित्र निर्माण नसके उक्त कम्पनीको ठेक्कना रद्द गर्ने समेत जानकारी दिइन् । 

चालु आवमा सरकारले झण्डै १६ खर्बको बजेट घोषणा गरेको थियो । तर आवको तेस्रो त्रैमासिकसम्मा राजश्व लक्ष्यको ३२ प्रतिशतमात्र हासिल भएको जनाउँदै सरकारले चैत महिनाको शिक्षक पेन्सन र सामाजिक सुरक्षाभत्ता वितरण गर्न नसक्ने जनाउँदै आएको छ ।