धौलागिरि र अन्नपूर्ण आरोहणका लागि ८९ जनाले लिए अनुमति

१४ वेशा, पोखरा । विश्वको सातौं अग्लो धौलागिरि हिमाल आरोहणका लागि वसन्तकालिन सिजनमा ३५ जनाले अनुमति लिएका छन् ।

उनीहरु आधार शिविरमा पुगिसकेका छन् । हिमतपात जारी रहेका कारण अनुकुल मौसमको प्रतिक्षामा त्यही रोकिएको पर्यटन विभागले जनाएको छ । 
म्याग्दीको धौलागिरि गाउँपालिका–४ मुदीमा अवस्थित धौललागिरिको उचाई ८ हजार एक सय ६७ मिटर रहेको छ ।

विभागका अनुसार अहिलेसम्म यो सिजनमा आरोहणका लागि २४ पुरुष र ११ जना महिलाले अनुमति लिएका छन् । उनीहरुलाई सेभेन समिट, इलाइट र पाइनर एडभेन्चरको व्यवस्थापनमा  अनुमति दिइएको हो । 

उनीरुबाट मात्र ८१ लाख ५४ हजार एक सय ७० रपियाँ रोयल्टी जम्मा भइसकेको पर्यटन विभागले जनाएको छ । अहिले हिमपहिरो हटाएर बाटो बनाउने काममा शेर्पाहरु खटिरहेको बताएका छन् ।

यस्तै, म्याग्दीकै अन्नपूर्ण गाउँपालिका–४ नारच्याङमा रहेको आठ हजार ९१ मिटर अन्नपूर्ण प्रथम हिमाल आरोहणका लागि यस सिजनमा ५४ जनाले अनुमति लिएका छन् । आरोहीबाट एक करोड ४ लाख २६ हजार चार सय १० रुपियाँ रोयल्टी जम्मा भएको विभागको भनाइ छ ।