कोशीमा पहिचान आन्दोलनकाे नेतृत्व गरिरहेका लिङदेन मञ्चको अध्यक्षबाट बर्खास्त

१८ वैशाख, मोरङ । कोशी प्रदेशमा जारी पहिचान आन्दोलनको नेतृत्व गर्दै आइरहेका कुमार लिङदेनलाई संघीय लोकतान्त्रिक राष्ट्रिय मञ्चले अध्यक्ष पदबाट बर्खास्त गरेको छ । 

यही वैशाख १२  गते बसेको मञ्चको बैठकले बहुमत केन्द्रीय सदस्यहरुको निर्णयले अध्यक्ष  लिङ्देनलाई पार्टीबाट हटाएको ज्ञानबहादुर गुरुङले एक प्रेस विज्ञप्ति निकालेर जानकारी दिएका छन् । बैठकले गुरुङलाई नै अध्यक्षको जिम्मेवारी दिएको छ । 

प्रदेशको नाम कोशीप्रति असहमति जनाउँदै पहिचानको आधारमा नामाकरण गर्नुपर्ने मागसहित उनले महिना दिन पहिलेदेखि नै आन्दोलनको नेतृत्व गर्दै आइरहेका छन् । लिङदेनले पार्टीको विधान र हित विपरीत गतिविधि गरेको आरोप लगाउँदै पार्टी विधानको परिच्छेद धारा १४ को ९७ (३) को ‘क’ र ‘ख’ बमोजिम पदमुक्त गरिएको निर्वाचन आयाेगमा दिएकाे निवेदनमा उल्लेख छ । सोको जानकारी निर्वाचन आयोगमा समेत दिइसकिएको छ । 

आयोगमा दिएको निवदेनअनुसार रिक्त पदमा विधानको परिच्छेद १० को धारा ५५ को (२) बमोजिम उपाध्यक्ष ज्ञानबहादुर गुरुङलाई अध्यक्ष चयन गरिएको उल्लेख छ । पेस भएको विवरण अद्यावधिक निवेदनमामाथि कानूनी प्रक्रिया अगाडि बढाइसकिएको आयोगले जनाएको छ ।

आयोगमा दर्ता संघीय लोकतान्त्रिक राष्ट्रिय मञ्चको केन्द्रीय कमिटीमा २८६ सदस्य छन् । पार्टी नेतृत्व आन्दोलनमा लागेको बेला मञ्चमा आन्दोलनको पक्ष र विपक्षमा मत देखिएको छ । यसको असर आन्दोलनमा समेत पर्न थालिएको आन्दाेलनकारीहरु बताउँछन् । यद्यपि, प्रदेशको नाम पहिचानको आधारमा नराखेसम्म आन्दोलन नरोकिने आन्दोलनकारीहरुले बताइरहेका छन् ।

यता, लिङदेनले भने पार्टी निर्णय नक्कली भएको बताउँदै ‘साथीहरुले सपनाको खोले खाएको’ प्रतिक्रिया दिएका छन् । आन्दाेलनका एक जनाकाे ज्यान गइसकेकाे छ । ज्यान गुमाएका पदम  लिम्बूलाइ केन्द्र सरकारले शहीद घाेषणा गरिसकेकाे छ ।