हिमपहिरोमा निधन भएकाको शव खलंगा ल्याइँदै, दुईको खोजी जारी

२१ वैशाख, दार्चुला । दार्चुलाको व्यास गाउँपालिका-१ मा मंगलबार दिउँसो गएको हिमपहिरोमा परी ज्यान गुमाएका यार्सागुम्बा संकलक ३ जनाको शव सदरमुकाम खलंगा ल्याइँदैछ । 

यार्सा संकलनका क्रममा ज्यान गुमाएका दार्चुलाको दुहुँ गाउँपालिकाका ३८ वर्षीया कमला कुँवर, १८ वर्षीय प्रवीण कुँवर र डोटीको जोरायल गाउँपालिकाकी क्षिमी सोमो थापाको शव भारतीय सडक प्रयोग गरेर खलंगा ल्याउन लागिएको हो  । 

यार्सा टिप्न जानेक्रममा उनीहरु अचनाक आएको हिमपहिरोमा परेका थिए । लगातारको वर्षाका कारण नेपाली भूमि प्रयोग गरेर शव ल्याउन कठिन भएकाले भारतीय सडक प्रयोग गर्न लागिएको हो । 

सोही हिमपहिरोमा परेर बेपत्ता भएका डोटीको जोरायलकी ४५ वर्षीया नक्नी डोल्मा थापा र सोही ठाउँकी २८ वर्षीया ईश्वरी थापाको पनि खोजी भइरहेको प्रहरीले जनाएको छ ।