पूर्वगृहमन्त्री खाँणलाई ‘संगठित अपराध’ कसुरमा अनुसन्धानका लागि म्याद लिइँँदै

२७ वैशाख, काठमाडौं । नक्कली भुटानी शरणार्थी प्रकरणमा अनुसन्धानका लागि बुधबार बिहान निवासबाटै पक्राउ परेका नेपाली कांग्रेसका नेता एवं पूर्वगृहमन्त्री बालकृष्ण खाँणलाई म्याद लिन काठमाडौं जिल्ला अदालतमा उपस्थित गराउने तयारी प्रहरीले गरेको छ ।

पक्राउ परेका अभियुक्तहरूको बयानले प्रकरणमा खाँणको संलग्नता बलियो रहेको पाइएपछि सम्पर्कविहीन हुने वा समर्थकहरूको भीड बढ्ने संभावना बढेपछि काठमाडौं प्रहरी परिसरले ‘जरुरी पक्राउ पूर्जी’ थमाएर आज बिहानै पक्राउ गरेको थियो । 

पक्राउपछि परिसर पुर्याइएका खाणलाई आवश्यक अनुसन्धानका लागि म्याद लिन आजै अदालतमा पेस गर्ने तयारी गरेको हो । उनीविरूद्ध ‘संगठित अपराध. र ‘ठगी’ कसुरमा अनुसन्धान गर्न म्याद लिइने भएकाे छ । 

मुलुकी अपराध संहिता २०७४ ले पक्राउ गरिएका अभियुक्तलाई पक्राउको २४ घण्टाभित्र पक्राउका कारण र अभियोजनसहित अदालतमा उपस्थित गराउनुपर्ने व्यवस्था गरेको छ । म्याद लिएपछि उनलाई प्रहरी हिरासतमा राखेर अभियोग कसुरमा बयान लिने क्रम सुरु हुनेछ ।

अघिपछि ढाका वा भादगाउँले टोपी वा बिना टोपी देखिने खाँणले आज ‘क्याप’ लगाएका छन् । 

प्रकरणमा उनकी धर्मपत्नी मञ्जु खाँण र कांग्रेस सभापति शेरबहादुर पत्नी आरजु राणा समेत मुछिएका छन् । उनीहरू दुवै जना बहालवाला सांसद हुन् । उनीहरूमाथि पनि रेकी जारी राखिएकाे बताइन्छ ।

अभियुक्त बालकृष्ण भने गएको मंसिर ४ को आमनिर्वाचनमा रुपन्देहीबाट एमालको उम्मेदवारसँग पराजित भएका थिए ।