प्रतिनिधिसभा बैठक पुनः सुरु, नक्कली भुटानी शरणार्थी प्रकरणले तात्यो सदन

२७ वैशाख, काठमाडौं । आजै १५ मिनेटका लागि स्थगित गरिएको प्रतिनिधिसभाको बैठक पुनः सुरु भएको छ । सभामुख देवराज घिमिरेले राप्रपा अध्यक्ष राजेन्द्र लिङ्देनलाई बोल्न समय दिएपछि बैठक सुचारु भएको छ । 

शून्य समय लिएर बोल्दै लिङ्देनले नक्कली भटानी शरणार्थी प्रकरणको कुनै पनि दोषी जोगाउने काम सरकारले नगर्न आग्रह गरेका छन् । प्रकरण मुलुकलाई नै अन्तर्राष्ट्रिय रुपमा लज्जित तुल्याउने किसिमका भएको र यसमा संलग्न जोही कोहीलाई कारबाहीको दायरामा ल्याउन सरकारको ध्यानाकर्षण गराए । उनले प्रकरणलाई अख्तियारमा बुझाउने गल्ती नगर्न पनि सरकारसँग माग गरे । साथै प्रकरणबारे संसद जानकारी गराउन सभामुखसँग रुलिङको माग गरे । 

यसअघि ११ बजे सुरु भएको बैठक राप्रपाका सांसदहरुले समसामयिक विषयमा बोल्न खोज्दा सभामुख घिमिरेले प्रि बजेट प्रस्तावमाथिको छलफल छिटो सक्नुपर्ने भएकाले सांसदहरुलाई बोल्न शून्य समय नछुट्याइएको जानकारी गराउँदा विरोध भएको थियो । विरोधपछि राप्रपाका सांसदहरुले रोष्ट्रम नै घेरेपछि बैठक स्थगित गरिएको थियो ।

आजको बैठकमा सांसदहरुले नक्कली शरणार्थीबारे चर्को रुपमा आवाज उठाएका छन् । उनीहरूले प्रकरणलाई निष्पक्ष छानबिन गरी सत्य तथ्य पत्ता लगाउन र कुनैपनि दोषीलाई शक्ति र पहुँचको आधारमा छुट नदिन सरकारको ध्यानाकर्षण गराइरहेका छन् । पक्राउ परेका विरुद्ध राज्य विरुद्धको अपराध कसुरमा मुद्दा चलाउनुपर्ने बताएका छन् ।

प्रकरणमा पूर्वगृहमन्त्री बालकृष्ण खाण, नेपाल सरकारका बहालवाला सचिव टेकनारायण पाण्डेलगायत १२ जना पक्राउ परिसकेका छन् । उनीहरुविरुद्ध फौजदारी कानूनअन्तर्गत ‘संगठित अपराध’ र ‘ठगी’ कसुरमा अनुसन्धान भइरहेको प्रहरीले जनाएको छ । सोही प्रकरणमा मुछिएका एमाले सचिव एवं सांसद टोपबहादुर रायमाझी भने फरार छन् । उनीसहित फरार सूचीमा ३ जना रहेका छन् ।