ब्याजदर घटेपछि बचतकर्ताहरू धमाधम बैंकबाट पैसा झिक्दै

३१ वैशाख, काठमाडौं । बैंक तथा वित्तीय संस्थाले निक्षेप दिने ब्याज दर घटेपछि निक्षेपकर्ताहरूले धमाधम बैंकबाट पैसा झिक्न थालेका छन् । निरन्तर बढेर दोहोरो अंकमा पुगेको बचतको ब्याज राष्ट्र बैंकले हाल एकल अंकलमा झारेको छ । यसबाट बैंकहरुमा निक्षेप घट्न सक्ने चिन्ता बढेको छ । 

वाणिज्य बैंकको प्रमुख कार्यकारी अधिकृतहरूको संस्था नेपाल बैंकर्स संघको हालैको बैठकले व्यक्तिगत मुद्दती निक्षेपमा ९.९९ प्रतिशत र संस्थागत मुद्दतीमा ७.९९ प्रतिशत ब्याजदर कायम गरेको छ । गत चैतसम्म मुद्दतीतर्फ ११ प्रतिशत माथि थियो । 

वैशाख २६ मा  बैंक तथा वित्तीय संस्थामा ५४ खर्ब ७४ अर्ब रहेको निक्षेप निक्षेप एकैदिन ४ अर्बले घटेर ५४ खर्ब ७० अर्बमा सीमित भएको छ । वैशाखमा घटेको ब्याजदर जेठमा कायम राख्ने भएपछि बैंकबाट पैसा झिक्ने क्रम बढेको हो । 

यता वाणिज्य बैंकहरूको निक्षेप एकैदिन ३ अर्ब घटेको छ । वैशाख २६ गते वाणिज्य बैंकहरूमा ४८ खर्ब २७ अर्ब रहको निक्षेप ३ अर्बले वैशाख २७ गतेसम्म आइपुग्दा ४८ खर्ब २४ अर्बमा झरेको छ । 

निक्षेपसँगै कर्जा प्रवाह समेत घटेको छ । वैशाख २६ गते बैंक तथा वित्तीय संस्थाले ४८ खर्ब ५६ अर्ब कर्जा प्रवाह गरेकोमा एकैदिन ६ अर्बले घटेर ४८ खर्ब ५० अर्बमा झरेको छ । वाणिज्य बैंकको मात्रै कर्जा प्रवाह ६ अर्बले घट्न पुगेको छ । कर्जा प्रवाहमा कमी आएसँगै कर्जा निक्षेप अनुपात (रेसिडी रेसियो( समेत ८५.२१ प्रतिशत रहेको छ ।