सहमति कार्यान्वयन नभएपछि उखु किसान फेरि आन्दोलित, माइतीघरमा किसानको धर्ना

४ जेठ, काठमाडौं । सरकारसँग भएको सहमति अनुसार उद्योगीले उखु किसानको रकम भुक्तानी नगरेपछि उखु किसान फेरी आन्दोलनमा उत्रिएका छन् । कपिलवस्तु किसान संघ तथा उखु किसान संघर्ष समितिको अगुवाइमा बिहीबार काठमाडौंको माइतीघरमा धर्ना दिएका हुन् । 

आर्थिक बर्ष २०७१/७२ मा सरकारले २५ प्रति क्विन्टल अनुदान उखु किसानलाई दिने निर्णय गरे पनि हालसम्म नपाएको भन्दै अनुदान रकम अविलम्ब असुल उपर गराई कारबाही गर्न माग गर्दै उनीहरूले धर्ना दिएका हुन् । उद्योगले लामो समयदेखि किसानको रकम भुक्तानी नगरेको उनीहरूको गुनासो छ । उनीहरूले सबै उखु किसानलाई अनुदानको व्यवस्था गर्नुपर्ने, कृषि उपजको सरकारले निर्धारण गरेको न्यूनतम् समर्थन मूल्य अनिवार्य रुपमा पाउने व्यवस्था मिलाउनुपर्ने माग गरेका थिए । 

त्यस्तै समितिले ट्याक्टर खरिद गर्दा सहुलियत दरमा भन्सार गराई कृषकले स्वयं ल्याउन पाउने गरि व्यवस्था मिलाउन पनि माग गरेको छ । सरकारसँग चार बुँदे सहमतिपछि स्थगित उखु किसानको आन्दोलनपछि किसानले साढे ४७ करोड भुक्तानी पाएका थिए । 

यसअघि उखुको बक्यौता रकम माग्दै गत २८ मंसिरदेखि काठमाडौंको माइतीघरमा आन्दोलनरत उखु किसान र सरकारबीच गत १३ पुसमा चार बुँदे समझदारीपत्रमा हस्ताक्षर भएको थियो । उनीहरूले सो सहमति अनुसार रकम नपाएको उनीहरुकाे गुनासो छ ।