सुदूरपश्चिममा माओवादी केद्रका ३ जना मन्त्री थप गरी मन्त्रिमण्डल विस्तार गरिँदै

५ जेठ, काठमाडौं । सुदूरपश्चिममा आज मन्त्रिमण्डल विस्तार गिरने भएको छ । मुख्यमन्त्री कमलबहादुर शाहले नेकपा (माओवादी केन्द्र)बाट 
थप ३ मन्त्री नियुक्त गरेर मन्त्रिमण्डल विस्तार गर्न लागेका हुन् । 

माओवादी केन्द्रले सुदूरपश्चिम प्रदेश सरकारमा रमेश धामी, झपट साउदलाई मन्त्री र गीतादेवी मल्ललाई राज्यमन्त्री बनाउने गरी नाम दिएको छ । तर सत्तारुढ दल नागरिक उन्मुक्ति पार्टी (नाउपा) भने अनिर्णयको बन्दी बन्न पुगेको छ । सुदूरपश्चिममा उसले बन्दी रिहाईकै मागलाई सरकारमा सामेल हुने वा नहुने विषय बनाएको छ ।

यही माग सम्बोधन गर्ने आश्वसन पाएपछि नाउपा केन्द्र सरकारमा सामेल भइसकेको छ । तर सर्वोच्चको आदेशले माग पूरा हुनेमा संशय पैदा भएको छ । तैपनि सरकारले आश्वसन दिन छाडेको छैन ।

नाउपा अलमलमा

पार्टी संरक्षक रेशमलाल चौधरीलाई यही मंगलबार सर्वोच्च आदलतले पनि जन्मकैद फैसला गरेपछि पछिल्लो समयमा नाउपा अलमलमा परेको छ । उसले चौधरी लगायत टिकापुर घटनालाई राजनीतिक मानेर त्यसमा दोषी ठहर्याई जेलमा बन्दी बनाइएका चौधरीसहित सम्पूर्ण बन्दीको रिहाईको माग पूरा भएमात्र सरकारमा जाने अडान लिइरहेको बेला सर्वोच्चको फैसला आएपछि दोधारमा पुगेको छ । 

रेशमले सवोच्चको फैसला मान्ने बताएपनि पार्टीले भने नेपालबन्द सहितको कार्यक्रम घोषणा गरेर सडक आन्दोलनमा उत्रिएको छ । टिकापुर घटनामा छानबिन भएर सरकारलाई बुझाएको तत्कालीन लाल आयोगको प्रतिवेदन सार्वजनिक गर्नुपर्ने नाउपाको मुख्य माग रहेको छ । साथै उसले प्रतिवेदन सार्वजनिक नगर्ने र बन्दी नछाडे रेशमलाई कानून बनाएर फासीमा दिन भनेको छ । 

यसैबीच प्रधानमन्त्रीले नाउपाको मागबारे सर्वोच्च अदालतको आदेशमै लाल आयोगको प्रतिवेदन सार्वजनिक नगरिएको जवाफ बिहीबार संसदमा दिइसकेका छन् । यसबाट पनि नाउपालाई आन्दोलनमा नैतिक संकट परेको ठानिएको छ ।

सर्वोच्चको फैसला बन्दीको विपक्षमा आएपनि रिहाइका लागि सरकारले भरपूर प्रयत्न जारी गरेको आवश्वन प्रधानमन्त्री प्रचण्डले सोही संसद बैठकमा दिएका थिए । तैपनि नाउपा विश्वस्त हुन सकेकाे छैन ।