नागरिक उन्मुक्ति पार्टीले फिर्ता लियाे नेपाल बन्द

५ जेठ, काठमाडौं । नागरिक उन्मुक्ति पार्टी (नाउपा) ले यही जेठ ६ गतेदेखि १० गतेसम्मका लागि गरेको नेपाल बन्द घोषणा कार्यक्रम फिर्ता लिएको छ ।

प्रधानमन्त्री पुष्पकमल दाहाल प्रचण्डले संसदमा लाल आयोगको प्रतिवेदन सार्वजनिक गरिने फौजदारी विधेयक संसदमा टेबल भइसकेको जानकारी दिएपछि बन्द र आन्दोलनका सबै कार्यक्रम फिर्ता लिएको नाउपाका वरिष्ठ उपाध्यक्ष दामोदर पण्डितले आज साँझ जानकारी दिएका दिएका छन् । 

उनले एक प्रेस विज्ञप्ति जारी गर्दै पार्टीका संरक्षक रेशम चौधरी लगायत टिकापुर घटनाका राज बन्दीहरुलाई कानुन बनाएर रिहाइ गर्ने, लाल आयोगको प्रतिवेदनबारे संसदमा नै जानकारी दिइसकेको बताउँदै बन्द फिर्ता लिएको जनाएका छन् । 

‘सरकार पक्षबाट  सम्माननीय प्रधानमन्त्री ज्‍यूले सदनमै ‘लाल आयोग’ प्रतिवेदन सार्वजनिक गरिने फौजदारी विधेयक संसदमा टेबुल भैसकेको लगायत अन्य राजबन्दीको रिहाइ कानुन संशोधन गरेर भए पनि निकाल्ने प्रतिवद्धता संसदमै जाहेर गर्नु भएको हुँदा सरकार पक्षसँग भएको सम्झौता सकारात्मक भएको महसुस नागरिक उन्मुक्ति पार्टीलाई भएकाले प्रेस विज्ञप्तिमा आह्वान गरिएको नेपाल बन्द कार्यक्रम अर्को सूचना नआउँदासम्म स्थगित गरिएको छ’ विज्ञप्तिमा भनिएको छ ।