जेठ मसान्तभित्र भैँसेपाटी सडकखण्डको काम सम्पन्न गर्न मन्त्री ज्वालाको निर्देशन

८ जेठ, काठमाडौं । भौतिक, पूर्वाधार तथा यातायात मन्त्री प्रकाश ज्वालाले ललितपुरको नख्खु–भैँसेपाटी–बुङमति अन्तर्गत भैसेपाटी आवास क्षेत्रको सडकखण्डको काम छिटो सम्पन्न निर्देशन दिदिएका छन् ।

सोमबार उक्त सडक खण्डको स्थलगत निरीक्षण गर्दै मन्त्री ज्वालाले जेठ मसान्तभित्र काम गर्ने प्रतिवद्धता ठेकेदार कम्पनीले गरेको भन्दै आफूले काम छिटो सम्पन्न निर्देशन दिएको जानकारी दिए। काम सम्पन्न गर्नेका लागि देखिने समस्याहरूलाई सरकारले समाधान गर्ने र ठेकेदार कम्पनीले पनि ढिला सुस्ती नगरि काम गर्नुपर्ने उनको भनाई छ ।

समयमा नै सडक निर्माणको काम सम्पन्न नभएको भन्दै भैँसेपाटीका स्थानीयबासीहरुले केही दिनअघि उक्त सडक खण्ड बन्द गरेर विरोध जनाएका थिए । मन्त्री ज्वालाले खानेपानी र सडकको काम अघि बढाउदा समन्वय नहुँदा सडक निर्माणमा ढिलाई भएकाले अब छिटो काम सम्पन्न हुने विश्वास व्यक्त गरे ।

मन्त्री ज्वालाले समयमा नै आयोजना सम्पन्न गर्न मुलुकको विकासको मोडललाई पनि परिवर्तन गर्नुपर्ने अवस्था देखिएको भन्दै अन्तर मन्त्रालय समन्वयमा पनि ध्यान दिनुपर्ने अवस्था रहेको जिकिर गरे ।