नागरिकता विधेयक प्रमाणीकरण विरुद्ध सर्वोच्चमा रिट

१८ जेठ, काठमाडौं । राष्ट्रपतिले बुधबार गरेको नागरिकता विधेयक प्रमाणीकरण विरुद्ध सर्वोच्च अदालतमा रिट पेस भएको छ । वरिष्ठ अधिवक्ता सुरेन्द्र भण्डारी लगायतले बिहीबार नागरिकतासम्बन्धी विधेयक प्रमाणीकरणको विरुद्ध रिट पेस गरेका हुन् ।

रिट निवेदन दर्ताको प्रक्रियामा रहेको छ । रिटमा राष्ट्रपतिको कदम खारेज गरी नागरिकतासम्बन्धी कानुन संसदीय प्रक्रियाअनुसार बनाउन माग गरिएको छ ।

वरिष्ठ अधिवक्ता भण्डारीका अनुसार राष्ट्रपतिबाट प्रमाणीकरण भएको विधेयकलाई तत्काल ऐनको अंग नबनाउन माग भएको हो । उनले राष्ट्रपतिबाट हिजो प्रमाणीकरण भएको विधेयकलाई ऐनको अंग नबनाइ पाऊँ भनेर माग गर्दै कार्यान्वयन नगर्न अन्तरिम आदेशसमेत माग गरिएको बताए । 

नागरिकता विधेयकसम्बन्धी समस्यालाई अध्ययन गरी दीर्घकालीन समाधान गर्नु भन्ने आदेश माग गरिएको उनले जानकारी दिए । नागरिकताको विषय दीर्घकालीन समस्या भएकाले संसदबाटै ऐन बनाउनुपर्ने भन्दै उनले यसको समस्या के हो र कहाँ कहाँ समस्या छ र समाधानका उपाय के के हुन् भन्ने अध्ययन गरी संसदलाई कानुन बनाउनु भन्ने आदेश मागेको बताए ।