हलिउडका लेखकको हड्तालका कारण जेनिफरको सिरिज बन्द

२० जेठ, एजेन्सी । राइटर गिल्ड अफ अमेरिकाका सदस्यहरुले गरेको हड्ताल एक महिना पुरा भएको छ । हालसम्म केही खास निश्कर्ष निस्किएको छैन । जसकारण लगातार शोहरुको सुटिङ बन्द भइरहेको छ ।

हालसम्म लेखकहरुको हड्तालका कारण ‘डेयर डेबिल बर्न अगेन’, ‘एबट एलिमेन्ट्री’, ‘स्ट्रेन्जर थिंग्स’, ‘सेटरडे नाइट लाइव’ जस्ता कैयौं शोको सुटिङ बन्द भइसकेको छ । हड्तालका कारण पहिला केही शोको सुटिङ प्रभावित भएको थिएन, किनकी उनीहरुले शोको सुटिङका लागि अनुमति लिएका थिए ।

शो निर्माताहरुसँग २ मे २०२३ अघि लेखिएको स्क्रिप्ट थियो । तर अहिले सबै शोको सुटिङ बन्द भएको छ, जसमा जेनिफर लोपेजको सिरिज ‘अनस्टपेबल’ पनि छ ।

राइटर गिल्ड अफ अमेरिकाका सदस्यहरु र एशोसिएसन अफ मोसन पिक्चर एण्ड टेलिभिजन प्रोड्युसरका सदस्यहरुबीच यो विषयमा कैयौं वार्ता भए पनि हालसम्म ठोस नतिजा निस्किएको छैन । यही बीच वार्नर बद्रर्स टेलिभिजन, युनिभर्सल स्टुडियो ग्रुप, डिज्नी टेलिभिजन स्टुडियोले आफ्नो लेखकहरुलाई इमेल गर्दै स्टुडियोलाई सहयोग नगरे निलम्बन गर्ने चेतावनीयुक्त पत्र पठाएको थियो ।

तर यो पत्रले पनि लेखकहरुलाई कुनै असर परेन । उनीहरु आफ्नो मागमा अडिग नै छन् । हरुले फिल्म र टेलिभिजनसँगै ओटीटी प्लेटफर्ममा प्रसारण हुने शोका लागि अधिकतम पैसा दिनुपर्ने माग गरेका छन् ।

उनीहरुले ओटीटी प्लेटफर्ममा आफूहरुले जति दबाबपूर्ण काम गरे पनि त्यसको पारिश्रमिक नपाएको आरोप छ । उनीहरुले ओटीटीमा प्रसारण हुने मुनाफाको शेयर दिनुपर्ने माग राखेका छन् । हलिउडका लेखकले २ मे २०२३ बाट प्रभावकारी रुपमा हड्तालको घोषणा गरेका थिए । हड्तालको चार साता बित्दा पनि कुनै समाधानको उपाय निकालिएको छैन ।

जसकारण लसएन्जल्समा निर्माण भइरहेका सबै शोको सुटिङ बन्द गरिएका छन् । लेखकहरुले सन् २००७ मा पनि तीन महिनासम्म हड्ताल गरेका थिए । त्यो समयमा लसएन्जल्सको मनोरञ्जन अर्थव्यवस्थामा करिब दुई बिलियन डर नोक्सान भएको थियो ।