संसद बैठकमा फेरि लफडा, सत्ता पक्ष र विपक्षी सांसदहरुबीच जुहारी

२२ जेठ, काठमाडौं । प्रधानमन्त्री पुष्पकमल दाहाल ‘प्रचण्ड’ले सोमबार बसेको प्रतिनिधिसभाको बैठकमा सांसदहरुबाट उठाएका प्रश्न र जानकारी माग गरिएका बारे जवाफ दिने क्रममा होहल्ला भएको छ । 

प्रधानमन्त्रीले मन्त्रिपरिषद बैठकले गरेको सिफारिसमा आधारमा यही जेठ १७ गते  राष्ट्रपतिबाट प्रमाणिकरण गरेका नागरिकता विधयेकबारे उठेको प्रश्नको जवाफ दिने क्रममा प्रमुख प्रतिपक्षी एमालेका सांसदहरुले नियामपत्ति जनाएका थिए । मुख्यगरी प्रमाणिकृत विधेयकबारे जवाफ दिने क्रममा एमालेका सांसद रघुजी पन्तले अघिल्लो संसदका पालाका राष्ट्रपति विद्यादेवी भण्डारीले विधेयक रोकेकाबारे चर्चा गर्न नपाइने भनेर नियामपत्ति जनाए ।

यसरी आपत्ति जनाएपति सत्तापक्षका सांसद रामहरि खतिवडा, विश्वप्रकाश शर्मालगायत सांसदहरुले प्रतिवाद गरेपछि जुहारी नै चलेको छ । प्रधानमन्त्रीले रोष्ट्रमबाट जवाफ दिने क्रममा एमालेका सांसदहरुले पटकपटक अवरोध पुर्याएका थिए ।

सांसद शर्माले सांसदहरुलाई प्रश्न उठाउन पाउने अधिकार भएजस्तै प्रधानमन्त्रीलाई आफूमाथि वा आफूले गरेका कामकारवाहीबारे उठेका प्रश्नको जवाफ दिन पाइने स्वतन्त्र र अधिकार रहने बताए । अहिले बैठक सूचारु भएको छ । प्रधानमन्त्री प्रचण्डले जवाफ दिने क्रम जारी छ ।