सांसदहरुको प्रश्नको जवाफमा प्रधानमन्त्रीले भने- ‘म धर्म निरपेक्षतावादी हुँ’

२२ जेठ, काठमाडौं । प्रधानमन्त्री प्रचण्डले आफू कुनै धर्मको पक्षपाती नभएको बताएका छन् । सोमबार बसेको प्रतिनिधिसभाको बैठकमा सांसदहरुले उठाएको प्रश्नको जवाफ दिँदै आफू कुनै धर्म विशेषको पक्षपाती नभई धर्म निरपेक्षातावादी भएको स्पष्ट पारेका छन् । 

आफूले हालै गरेको भारतको औपचारिक भ्रमणका क्रममा इन्दौरमा महाकालेश्वर मन्दिरमा सबै धर्मवालम्वीको सम्मान स्वरुप गेरुवस्त्र लगाएर पूजा गरेको प्रष्ट पारेका छन् ।

यसअघि आजकै बैठकमा केही सांसदहरुले ‘प्रधानमन्त्रीज्यू, तपाईँ नास्तिक र आस्तिक हो ?’ भन्दै गरेका प्रश्नको जवाफमा प्रधानमन्त्री प्रचण्डले इन्दौरको महाकालेश्वर मन्दिरमा मन्दिरको प्रोटोकल अनुसार नै गेरुबस्त्र लगाएर पूजापाठ गरेको बताए । आफू कुनै एक धर्म मान्ने वा कुनै एक धर्मको पक्षपोषण गर्ने व्यक्ति नभएको स्पष्ट पारे ।

 ‘म सिद्धान्त तः र प्रष्ट धर्मनिरपेक्षतावादी हुँ । सबै धर्मलाई समान मान्यता दिनुपर्छ । राज्यले कुनै धर्मलाई नजिक र कुनै धर्मलाई टाढा बनाउनु हुँदैन भन्ने पक्षमा छु, यो कुरा प्रष्ट होस्’ प्रचण्डले भने ।